無綫《木人巷》選全能藝人 港姐黃嘉雯郭柏妍力爭女一

·3 分鐘文章
黃嘉雯恨挑戰反派角色,證明自己絕非花瓶。
黃嘉雯恨挑戰反派角色,證明自己絕非花瓶。

無綫廣發英雄帖,招募全能藝人參加節目《飛越木人巷》,港姐黃嘉雯、郭柏妍及香港先生許家傑率先下「戰書」,2女表示若勝出,想一嘗演反派及空姐;自誇38歲依然好有火的許家傑則坦言,想突破「送水輝」框框!

電視城「木人巷」全是身經百戰、坐擁十八般武藝的全能藝人,無綫之前銳意改革綜藝節目,先後炮製《好聲好戲》及《盛.舞者》,發現電視城是臥虎藏龍之地,繼跳舞及配音後,日前再內部廣發英雄帖,招募演、歌、舞、Gag、主持全能的藝員參與《飛越木人巷》大挑戰,如在節目中通過「綜藝全能」及「戲劇全能」考驗並獲得「TVB全能藝人」殊榮,可以成為綜藝節目主持或劇集主角,多位小花及二線男藝人都躍躍欲試!

黃嘉雯昨日受訪時說:「選完港姐好耐冇比賽,都想挑戰自己,借呢個機會進步。(想演咩角色?)想挑戰奸角或反派,令觀眾更想追看角色有咩苦衷做壞事,好似袁偉豪喺《刑偵日記》嘅奸角,打破佢以往嘅正派形象,做得好好,好有新鮮感!」她一直夢寐以求做旅遊節目主持,更愈講愈興奮:「飲食節目都好適合我,我好大膽,上山落水都冇問題㗎!」

游嘉欣恨拍科幻劇

另一港姐郭柏妍亦想參加:「因為有機會表現自己,之前好好彩有劇拍,知自己真係好鍾意做戲,任何角色都想試。我細個一直覺得空姐好靚,好想試吓演空姐。」而新人游嘉欣則想透過比賽累積經驗:「啱啱接觸演戲,做過嘅角色唔多,好多角色都有興趣。我自細就好鍾意科幻嘢,好想試吓呢類劇集。」

許家傑甩「送水輝」框框

男將方面,憑《愛.回家之開心速遞》中「送水輝」一角入屋的許家傑,自爆已報名:「我唔係想做男一,而係希望除咗『送水輝』之外,畀觀眾睇到我許家傑仲有乜嘢!」又透露報名表格要填自我介紹及參加原因:「我寫『38歲但仍然好有火嘅演員』,我一係唔做,一做就好認真!」問若做「男一」想拍甚麼劇,他說:「梗係籃球或者跳舞啦!不過我仲有個心願,贏咗至講出嚟。」

孔德賢同樣想拍運動題材劇集:「想演一個本來唔叻運動嘅人,經過努力同苦練成為成功選手,希望觀眾感受到運動員嘅激情,同埋知道『台上一分鐘、台下十年功』。」丁子朗亦想挑戰自己:「希望喺其他同事身上學到更多。」

愛上演戲的郭柏妍,希望透過拍劇圓「空姐夢」。
愛上演戲的郭柏妍,希望透過拍劇圓「空姐夢」。
自認演戲新丁的游嘉欣,早前在《香港愛情故事》的演出令人驚喜。
自認演戲新丁的游嘉欣,早前在《香港愛情故事》的演出令人驚喜。
許家傑望突破「送水輝」框框,最想拍有關籃球的劇集。
許家傑望突破「送水輝」框框,最想拍有關籃球的劇集。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能