《熱戀期有咩好懷念？》

有人話一段感情最甜蜜就係熱戀期，因為過咗熱戀期之後嘅男人就會變咗，就唔會再當你公主咁。有人又話熱戀期係拍拖嘅頭三個月（亦有人話一年），總之就講到嗰段日子係最美好嘅時光咁話。但我諗所謂嘅「熱戀期」都只係一個階段，一個互相認識嘅階段。

啱啱一齊就梗係好甜蜜啦，拖下手仔都仲會心跳，又因為大家啱啱開始，所以大家都未得到足夠嘅安全感，於是就會拼命去建立呢段感情，又會拼命去對對方好，所以開頭嘅時候雙方都仲會愛得特別努力。我諗，呢個就係大家所謂嘅「熱戀期」。

到後來大家已經熟悉咗，拖手唔再心跳，甚至喺對方面前做核突嘢都唔會尷尬，又因為建立咗感情基礎，大家都唔再需要太拼命去付出都可以好好經營。有啲人就係因為咁而覺得對方唔同咗，「點解你唔好似追我嗰時咁努力？」「點解你唔再為我花心機吖！」於是就開始感歎熱戀期過咗，人就變咗啦⋯⋯

根本熱戀期只係一段感情嘅首部曲，同電影trailer一樣，大家都出盡全力放哂最好嘅心機入去。熱戀期同青春期一樣，只係漫長道路上嘅一個階段，我哋唔能夠永遠停留喺同一階段，而且一個好嘅情人會令你想到達未來，而唔係回到過去。