獨家專訪:靠自己安樂啲! 蔡潔被出價邀做「女友」 拒絕潛規則

蔡潔有自己的底線,不會接受潛規則!
蔡潔有自己的底線,不會接受潛規則!

蔡潔在新劇中為男友甘願下海成為夜總會的「當家第一頭牌」,網民看得肉緊,不忿其戀愛腦得過分。為投入角色,蔡潔請教做過夜場的朋友,感覺夜場與娛樂圈有點相類似,她自爆初入行時有人出價邀做「女友」,笑言未傾到具體細節已一口拒絕。

蔡潔在《一舞傾城》飾演的Monica是「當家第一頭牌」,80至90年代的濃妝配以大波浪髮型,遭網民大彈唔靚,她有看過所有評論包括負評,試過親自回應網民,同意造型麻麻,網民Like爆。她直言每個女仔試造型時都一定不慣,尤其自己並非零死角,不受濃妝:「我唔係乜嘢造型都Carry到,原本造型係長髮過腰,大波浪頭顯得我頭大同面形唔靚,但因為要保留呢個標誌性潮流,有啲相,我都嗌:『我的天呀!』不過一年後再睇,睇慣咗都接受。」不同角色希望帶來新形象,知道有人認不出她,自言樂於如此:「透過造型同演繹唔同,唔係蔡潔,可能對演員係好事,我個樣係一張白紙,淡妝同濃妝好唔同,希望每個角色喺白紙上畫唔同圖畫。」

劇情講述她為會計師男友何浩文籌錢打官司而下海,近日更推進到發現何浩文偷食地產妹,與男友攤牌時更遭對方掌摑,劇情相當虐心,亦有網民質疑她演的角色戀愛腦得太緊要,引起熱論,蔡潔亦笑言自己少女時都是戀愛腦,但現已改變:「依家大個女,如果另一半有乜事,自己負責番,各有前程,來生再見吧!哈哈!」

「有日唔出Offer點算?」

蔡潔為了拍該劇,曾請教過做過夜場的朋友,發現夜場的門檻,外表並非唯一,覺得與娛樂圈好相似:「唔係靚就得要好醒目,夜場嘅『金魚』,要有技巧服侍客人;娛樂圈既要演好角色,又要面對不同挑戰同評論,遇到複雜情況必需能屈能伸,唔好畀人迷惑到。(有冇人提出過潛規則?)入行冇幾耐有,試過2、3次,我明確表示我冇能力,態度好明確,因為冇傾落去,唔知具體Offer。」她稱對方都是優秀、事業有成人士,笑言想找「合作夥伴」好容易,毋須在她身上糾纏:「都係做番自己,佢哋要求做女朋友,有日唔出Offer點算?靠自己安樂啲,我底線唔可以對唔住自己,屋企人更加唔可以。」

蔡潔在劇中為男友何浩文籌錢打官司而下海。
蔡潔在劇中為男友何浩文籌錢打官司而下海。