王晶監製叻哥主演 難頂台慶劇《賭城群英會》

大台每年一到10月、11月就會推台慶劇，是為最大堆頭之作，據大台自己所講就係背景浩大、演員架勢、劇力萬均嘅重頭劇啦；要數歷年經典台慶劇都可以話好猛料，例如近年嘅《梟雄》、《名媛望族》、《大太監》、《名門暗戰》等，而且好多角色都係當屆頒獎禮嘅大熱人馬，所以台慶劇自必然引起觀眾無限期望啦。至於今年喇喎，大台嘅台慶劇之一《賭城群英會》就未宣傳已經史無前例獲得一片負評！究竟咩事未正式宣傳已經咁差呢？一齊睇睇。

王晶＋賭
一聽個名，係呀，又係講賭呀，係呀，又係王晶呀，原來呢套劇係王晶35年後再次為大台做監製嘅劇。一聽到王晶呢個名，相信已經嚇走咗一半人啦下嘛？唔難想像應該係將《賭城風雲》嘅嘢搬過嚟電視再重做一次。咩話？仲頂得順？好，請睇埋下面。

叻哥係男二
王晶如果都未嚇怕你嘅話，仲有晶哥最啱Key嘅陳百祥阿叻！阿叻仲會飾演男二角色，一位名為「是旦哥」嘅賭徒，都係爛賭二啦即係。當中大家應該可以想像到佢會戲中教人點賭，唔單止劇種炒冷飯，連角色都要炒？諗起係咪都想熄電視呢？

難頂人名
經歷過《殭》，大家都知大台啲人改名可以幾有創意，什麼「刑活著」、「藍夢南」、「凌風」，今次《賭城群英會》一樣唔令大家失望，包括由謝賢飾演嘅「向無名」、劉兆銘演飾嘅「屠城」等，喂大佬，宜家咩年代呀？仲有人改呢啲武俠小說名咩？

麥明詩＋鴨王
成套劇拍嗰陣都無咩新聞，最大新聞就係麥明詩同鴨王Dominic不停傳緋聞，又話Dominic力追，又話麥明詩同原男友林作分手；原來就係拍緊呢套劇日對夜對。不過論實力同經驗，呢兩位新人好似未夠資格做台慶劇，預計到時大家又要邊睇邊鬧喇。

取景地大陸
可能「受惠」於王晶啦，成套劇取景地除咗香港，唔少得嘅係澳門，同埋一半時間其實都喺大陸深圳拍；可以預計到係用嚟賣番大陸市場播放之用，即係話劇情9成9都係啱大陸朋友睇嘅老土方程式。