【玩樂】十不思議聖誕節

分手總要在聖誕？
唔係講笑，根據一項來自facebook的研究顯示，聖誕係分手嘅熱門時刻，至於點解就真係一個好深好深嘅問題…情到濃時，亦可能係感情最容易發生危機嘅時候？又或者大家諗多咗，可能只係無聊到因為買錯禮物而鬧分手？？

白色唔係傳統聖誕色系
問十個人可能有過半都覺得紅、白係聖誕傳統顏色，啱咗一半。
可能大家一諗聖誕就諗起落雪(但係其實好多地方都同香港一樣聖誕無雪落)，三個聖誕傳統顏色係綠、紅、金，唔係吹水，係有原因㗎，綠色有著聖誕樹所代表嘅生命力同重生；紅色代表耶穌嘅血，以及夏娃跟亞當在伊甸園吃過樹上嘅蘋果；金色代表光明、心靈嘅光、以及耶穌復活嘅光芒。

聖誕燈飾第一人？
愛迪生發明燈泡大家都知，仲發明咗留聲機、攝錄機….多到不能盡錄，而佢嘅同事Edward Johnson就一直無乜驚世之作，直到1882年，佢發明咗將小燈泡串成聖誕燈飾佈置喺紐約嘅屋企，自此一舉成名。

聖誕樹不在伯利恒
聖誕樹當然不會無中生有啦，不過翻查典故都有好幾個有關聖誕樹來歷嘅版本，出現第一棵聖誕樹其中一個說法係喺拉脫維亞首都裡加；亦有人話聖誕樹第一人係我們認識嘅新教馬丁路德；大家都鍾意聽故事，另一個講法係，有一個德國僧侶走過樹林仰望繁星密布嘅天空，令佢想起樹木嘅啞枝，於是就斬下一棵小樹返屋企，點上蠟燭，亦成為史上第一個聖誕樹佈置嘅構思。

聖誕老人唔係人，係戰神？
來自北歐神話嘅「戰神」奧丁，據聞係聖誕老人嘅靈魂人物。據講奧丁騎上八腳戰馬四出飛馳，好多細路會將蘿蔔 、糖放到奧丁嘅靴子，並將稻草放到煙囪讓戰馬休息。而奧丁返來時會將戰利品和禮物放進靴子獎勵班細路，個故事係咪似曾相識呢？

東方三博士送禮之謎
根據基督教傳統，東方三博士喺耶穌出世嘅時候送上三份禮物：黃金、沒藥同乳香，其實係有原因，唔係亂嚟架。黃金通常係進貢皇上專用，亦即三博士承認耶穌為王；乳香經常喺宗教儀式使用，象徵耶穌嘅神性；沒藥有異常嘅香味，有防腐之用，亦預知了耶穌終會為人類犠性而死。

點解聖誕鹿Rudolph 個鼻係紅色？
人類同其他動物唔同，就係因為有查根究底嘅精神，有科學家真係嘗試研究點解聖誕老人嘅拍檔Rudolph個鼻點解變咗紅色。英國醫學雜誌將深居冰雪地方嘅五個人類同兩隻鹿嘅鼻液樣本做研究，結論係Rudolph嘅紅鼻係喺極低温下開太多OT過度勞累所致。
至於點解其餘八隻鹿嘅鼻係黑色？你明嘅…間間公司都總有唔少懶人嘛….

Jingle Bell不是聖誕歌
全球五十多個語言版本嘅Jingle Bell唔係聖誕歌？無錯，最開始呢首歌其實係一間學校慶祝感恩節寫成嘅歌，而且…Jingle Bell嘅原曲歌名叫One Horse Open Sleigh而唔係叫Jingle Bell，歌詞亦略有改動。

第一首太空錄製嘅歌曲係聖誕歌
第一個加拿大籍太空人Chris Hadfield創下史上第一首太空錄製歌曲"Jewel in the night"，用簡單嘅木結他向佢嘅家人同朋友送上祝福，呢首歌喺2012年聖誕放上youtube勁搶250000點擊。

經典聖誕歌效應
有聖誕點可以無音樂，流行唱片史上亦出現過幾個奇蹟，一提到聖誕歌，大家可能都不忘Wham的名曲Last Christmas，當年呢張Single亦少有地成為銷售過千萬而未有一個星期稱冠嘅慢熱細碟；另外Bing Crosby翻唱White Christmas的版本更刷得5千萬全球銷售數字。貓王皮禮士利亦憑一張聖誕專輯成為全球有史以來最暢銷的聖誕歌唱片。

圖片來源：
https://www.flickr.com/photos/arne-halvorsen/4174273444