【玩樂】聖誕部屋慳位布置法

聖誕臨近，無論你會唔會響屋企開P，都會想布置家居開心吓。傳統做法當然係響大廳擺棵聖誕樹，但今時今日連「豪宅」都只得400呎，放完棵樹個廳都無左三份二，行出行入名副其實篤眼篤鼻，其實，即使地方同budget有限，只要用少少創意同心思，一樣可以為家居增添節日氣氛。

聖誕 Centerpiece
材料：生果、碟、糖霜
如果你有張大飯檯，只要鋪一張深色檯布，用一個乾淨嘅碟（最好揀有腳同埋高身）放滿唔同顏色嘅生果，想靚少少可以放啲大塊嘅菜葉鋪底，然後灑上大量白糖霜，已經可以成為客廳焦點。

聖誕咭樹
材料：聖誕咭、星星一枚
雖然近年大家習慣send e-card寄少咗聖誕咭，但儲儲埋埋總有十零張唔捨得掉嘅。響屋企揀一個位，用Blu-Tack或者雙面膠紙由上到下貼成三角形，再加個星星響頂。除咗增添聖誕氣氛之外仲可以藉此機會展示朋友對你嘅祝福。

聖誕燈飾
材料：顏色紙
唔需要使錢特登去買一啲用兩個禮拜之後唔知點處置嘅燈飾，想加添聖誕feel只需要花少少時間同心機，用唔同顏色o既紙剪出雪人、聖誕樹、雪花等圖案，貼響燈罩上面、又或者貼響玻璃樽外邊再放枝短蠟燭入去，自然可以映照出聖誕光影。

自製雪景球﹝Snow Globe﹞
材料：銀粉或化妝閃粉、膠製或陶瓷公仔、甘油、玻璃樽
呢招係家政女皇Martha Stewart教嘅，做法非常簡單。只需要留起一啲用完嘅玻璃樽洗乾淨，將你鍾意嘅嘅小擺設（或者買一啲聖誕雪人、聖誕老人公仔）用超能膠貼響樽蓋內側。再用水混合銀粉及適量甘油（Glycerin，普通葯房有售）倒入樽至90%滿，小心將樽蓋扭實。搞掂！你屋企就有一個獨一無二嘅自製雪景球啦！

圖片來源：
flickr: https://www.flickr.com/photos/11887315@N05/6403271311