甘肅地震｜彭丹發振災相「天佑甘肅」被內地網民質疑造假：甘肅那邊的天氣穿單衣就可以？

甘肅日前發生6.2級地震，導致多人傷亡，內地演藝界藝人都紛紛捐錢振災祝福。作為甘肅省政協委員嘅演員彭丹亦發文為甘肅祈福，更配上多張振災照片，不過就被唔少網民質疑係舊相，紛紛指責佢借振災之名抽水，甚至將佢同熱心公益，今次都有到甘肅振災嘅內地藝人韓紅比較。

彭丹日前就喺微博發文「#祈福甘肅願平安# 天佑甘肅，風雨同舟，共渡難關，愿甘肅同胞平安！」，配上多張自己搬振災物資等等嘅照片。不過眼利嘅網民就發現相中嘅彭丹身穿單薄衣物，背後嘅人更加疑似身穿短袖上衣，認為甘肅現時零下幾度嘅天氣根本冇可能咁樣著，認為佢係用舊相造假「這邊溫度零下十幾度，你穿這個？作秀博眼球好歹也有點常識吶」、「笑死 甘肅現在冰天雪地，圖片一個個穿的是夏天 ，太假了」及「甘肅那邊的天氣穿單衣就可以？」等等。

對比起另一位一直熱心公益，今次都有到甘肅振災嘅內地藝人韓紅喺其他照片中所見就需要身穿厚厚嘅外套御寒，另一位據知有參與今次振災嘅藝人陳曉亦需要穿著外套，與彭丹微博發文中嘅衣着的確相差甚遠。不過彭丹亦都冇提過相片係今次振災，而佢亦冇出面回應網民指控。

現年51歲嘅彭丹曾於香港發展，出演多套三級片，更曾多次出演「獎門人系列」，以「E字馬」（一字馬）最為香港熟悉。2013年佢開始從政，成為甘肅省政協委員之一，其後更被推薦為「全國青聯常委」。