生日預咗驚喜欠奉 湯洛雯冇啖好食 靠馬國明餵飽

視帝陳展鵬與湯洛雯（靚湯）昨日為新劇開工，靚湯因胃炎要戒口，指男友馬國明只懂叮粥給她吃。而劇集因疫情而停工了一段日子再開，展鵬笑指感覺似開拍第2輯。

因疫情停工多月的無綫劇《隱門》終於復工，昨日的場口以文戲為主，近來飽受胃炎困擾的靚湯，隨身帶備麵包醫肚：「出面唔敢亂食嘢，喺屋企通常食粥。（男友馬國明靚粥？）佢都唔識煮嘢，不過會幫我翻熱啲粥嘅。」本月6日生日的她，笑稱沒期望過男友送上驚喜，但甜絲絲說：「我哋好少正日畀驚喜，不過平時會做啲窩心嘢。（例如呢？）呢啲秘密唔講啦，我諗佢應該會買蛋糕啩，哈哈。」她希望早日完成拍攝放假休息，或會陪男友出埠工作，順道旅遊：「睇佢去邊啦，目的地吸引會跟埋去。」前日靚湯在社交網上載近照，捧住一大束靚花與蛋糕合照，笑得燦爛又Sweet！她在貼文寫到：「生日月，我大晒！」未知是否跟馬國明撐枱腳食生日飯？

陳展鵬想帶妻女飛北京

另外，陳展鵬幽默表示復工感覺似開拍第2輯：「通常拍劇係冇得瞓，今次休息多咗反而離開咗個感覺，要啲時間捉番。」並透露稍後會飛北京拍劇：「要拍幾個月。（唔擔心疫情？）有關注嗰邊情況呀，因為想帶埋太太同小朋友一齊去，大家都守咗2年幾，太太咁辛苦，小朋友又未飛過，當去個旅行。（會唔會3個去，4個返？）可能5個呢？哈哈！順其自然啦，冇專登Plan，不過最好一個一個嚟啦，突然多兩個要考慮好多嘢㗎！」

談到有傳太太單文柔與無綫合約即將完結，早前又透露有新開始，他表示留待太太親自解答，作為老公只需全力支持：「就算佢選擇唔做嘢抖吓都冇問題，做自己鍾意做嘅嘢就得喇！」