男同女天生根本就係兩個不同嘅物種，咁又何必正面衝突呢男士們！正所謂辦法總比困難多嘛！

喺各人嘅生活裡面，應該都有好多生活上或者習慣上嘅矛盾。細個嘅時候成日都見到阿爸阿媽為咗啲小事而爭論，但其實真係好小事咖咋！女士其實簡單啲，多數都係見到靚或者得意就會買番屋企。而眾多嘅大男人都會不其然咁有以下嘅對白－喂老婆丫，你買埋買埋咁多嘢都唔見你用嘅？冇用就揼咗佢啦唔該！成屋都係你啲嘢喇！喺呢個時候大部分女士都會反駁，你唔知咁多咖喇，全部都有用咖！如果而家揼咗佢，第日先發覺有用，咁咪又要買過！哈哈，差不多每個禮拜都見到以上呢一幕。

到我大個咗成家立室後就發覺，有陣時準備工夫做得足，都未必可以十全十美咖，以前見到父母為咗啲小問題而爭論，而家輪到我了。其實大部分男人嘅嗜好來來去去都係嗰幾様，玩具、模型、車、相機、錶同埋影音產品，而我就中咗影音產品呢樣嘢，但一路都比屋企地方所局限。

直到今年年頭有機會換樓，先叫做可以容納多少少嘢。大部分家電其實都可以用得番，但係部電視一放上櫃就出事，點解？因為之前舊屋太細，所以只可以放到部40" 電視，但而家屋企大咗，當我用嚟睇戲嘅時候就......出事了！有啲似以前喺房睇部膽機14" 電視仔咁，於是我就問老婆，你覺唔覺得部電視好細丫？佢回我一句：「仲睇到喎，仲用得你都想換丫？唔浪費咩？」就係咁我冇再講落去了，費事又同佢抝啦。

不過一向鍥而不捨嘅我就開始諗計勸服佢，我知佢超鍾意上網睇劇，同埋大陸嘅綜藝節目，咁如果符合到呢啲要求，應該可氹得掂佢！

之前我喺啲Forum 度見到好多人講一個電視品牌，功能上部電視已經有內置盒子，除此之外佢呢部仲係一部4K電視。呢個牌子所提供到嘅平台(軟件)同硬件簡直係合晒我同老婆嘅心水，而重點係個價錢比起其他所謂大牌平好得多。問題係可以喺邊度買到呢？原來要花少少時間去捕住佢喺網上不定時嘅搶購活動，個個月都有得搶。好！咁我就一於搶佢番屋企自娛之餘，又可以氹下老婆，等佢可以坐定定咁煲劇睇戲啦！

但今次係我喺冇諮詢老婆嘅情況下，私自買呢件大電視番嚟！其實真係好戰戰競競咖你都咪話！但世事往往出乎意料喎！感覺就好似係某桑拿廣告咁“連老婆都讚好”。以前每買一樣嘢番屋企，大家都會互相彈三彈四，總係要鬥吓咀先安樂，但今次我只係同佢講：「呢個電視品牌係有你最愛嘅煲劇組合喺入面咖，內置盒子入面好多嘢都係你至Like嘅節目嚟咖，唔單止有過萬小時節目， 仲有過500小時4K 節目！」開頭佢以為我老點佢，但一開機上手後佢就笑咗出嚟，同我講：「真係有齊喎！！好嘢！！」

呢個偉大嘅科技除咗可以滿足我一己私慾之外，仲好似靈丹妙藥咁，令到我同老婆第一次冇再就買嘢番屋企而爭拗喇！總算係一個好開始丫！

撰文：車伕嗱

延伸閱讀：4K電視 - 除左要負擔得起，重要識得揀！

(資料由客戶提供)