《真正浪漫在日常生活裡》

情人節，一個屬於浪漫嘅節日，而喺呢日嘅「浪漫」九成都係同金錢掛咗鈎。有錢就可以去一間充滿浪漫氣氛嘅靚境餐廳，有錢就可以買一紥包得好靚嘅花，有錢就可以買一份情人想要嘅禮物，有錢就有浪漫。

有人話：「一個男人肯花錢喺你身上，都係愛你嘅表現。」某程度上都啱㗎，一個男人連一蚊都唔想用喺你身上的確係唔愛你，但一個捨得為你使錢嘅男人係咪就代表真係愛你呢？我有保留。

用錢買到嘅浪漫，任何有錢嘅人都可以帶到畀你，而且花永遠都有更靚更大紥，餐廳永遠都有更貴更浪漫，所以呢啲都係數字遊戲啫。其實今日人人都做同一樣嘢，有咩咁特別？

情人節一早已經變咗一條formula：花＋禮物＋西餐。每個男人都跟住呢條formula走，於是每對情侶嘅情人節都過得差唔多。大家都出於「人有我有，人做我做」嘅心態，總之唔使做太多，但最緊要唔好做少，做少咗好似會蝕底一樣。

但真正懂得浪漫嘅男人，係識得將浪漫放入日常生活。

見到你鍾意嘅嘢會偷偷買畀你，天氣凍時會緊緊攬實你，你病時會好好照顧你，會陪你做你想做嘅嘢，為講甜言蜜語去氹你⋯⋯識做呢啲嘢先係真正懂得浪漫。淨係用錢去買浪漫嘅，只係一個有錢但無心意嘅土豪。千萬唔好用一日嘅表現去否定一個人其餘364日付出，都唔好因為一個人用好多錢喺你身上，就感覺被愛。