研究發現：33歲係人生最幸福嘅時刻？

有無諗過自己一生中幾時先係最幸福嘅時刻呢？啱啱成年？可以做咩都得，青春無敵嘅18歲？定係無憂無慮嘅童年時代？抑或是7老80兒孫滿堂，安安樂樂享受退休生活嘅時間？原來以上都唔係，一項研究發現33歲先係人生最幸福嘅時刻。

根據《Time》（《時代》）雜誌報道，英國社交網站Friends Reunited調查咗1萬幾個40歲以上嘅人，70%覺得33歲係佢哋最快樂嘅年齡，得16%覺得童年最幸福，亦只有6%覺得大學時期最幸福。

到底點解會咁？雖然童年好似日日都好開心，因為輕輕鬆鬆又過一日，但係好多嘢都係學緊，仲係到摸索緊呢個世界，同埋好多人大個咗都唔記得自己細個做過咩，印象其實好模糊。至於18-22歲大學時代雖然終於成年，但其實呢個就係大人同細路嘅分水嶺，失驚無神要負起一大堆責任，要自己一個諗將來條路點行，無人會再幫你，其實會好迷惘。

咁33歲又有咩特別？調查話，屋企同朋友係快樂嘅最主要原因，三分一就因為有小朋友，五分一就因為事業有成就。唔好話我老土，正所謂「三十而立」，過咗30通常有咗自己嘅事業，成家立室，身邊仲有識咗十幾年「促膝把酒傾通宵都不夠」嘅好友，年紀又唔算老，可以有能力有體力做想做嘅野，真係perfect timing。

過咗三十，你就會知道無論Facebook、Instagram有幾多個like，都及唔上有一個明知聽日要番工但都因為你唔開心而陪你通宵嘅死黨，又或者知道屋企有人等緊你返去係幾幸福嘅事。