科幻新體驗 有苦自己知 古天樂強忍10級痛 青雲：難怪經常黑面！

兩大影帝古天樂（古仔）與劉青雲主演的科幻片最近上畫，兩人在片中要負重33磅盔甲拍攝，青雲拍到右腳受傷，花了9個月才痊愈，古仔則頸椎出問題需打嗎啡止痛，最終要遠赴美國做手術，為理想大犧牲。

古天樂耗資4.5億港元製作的本港首部科幻電影《明日戰記》近日上映，他與另一主角劉青雲接受訪問為電影宣傳。戲中二人需要穿上33磅重的盔甲拍攝，加上天氣酷熱及連串動作場面，過程辛苦，古仔笑言因盔甲穿着需時，連洗手間也不敢去：「着住件盔甲吊威吔，我拍完套戲瘦咗8至10磅。」

青雲雖然未有拍到瘦，卻是筋疲力盡，拍攝初期已受傷：「我傷咗右腳腳掌，但都要負傷拍完套戲，所以花咗9個月先好番。（拍呢套戲係大整蠱？）唔係，我之前拍《神探大戰》都辛苦，要着7件衫，呢套戲都係辛苦，天氣熱，唔止拍到底褲濕埋，連盔甲都倒得出水。」

古仔拍攝期間沒有明顯傷患，但拍完兩年後才發現頸椎出問題：「我去咗美國做手術，將頸椎兩節骨換成鈦金屬，應該係因為拍呢套戲長期着住咁重盔甲有關，我睇醫生嘅時候，醫生問我1至10級係幾級痛，我話係10級，我係長期痛，痛到要打嗎啡，而且瞓覺唔可以轉身，只有一個位係唔痛。」他稱最搞笑是做手術前打麻醉針，藥力差不多發作時醫生突然要他簽字，他以為是生死狀，原來是關於手術過程中若發現第三節頸椎有問題的更換同意書，青雲即開玩笑說：「原來你咁痛，唔怪得你喺片場經常黑口黑面，咁你依家咪好硬頸？」

拍到精神分裂

雖然拍攝過程艱辛，但二人認為很值得，青雲指今次是全新體驗：「有好多嘢未見識過，有啲地方都好好玩，有機會唔介意再拍科幻片。」問到古仔該片是否已結合了他所喜愛的科幻元素？他說：「我都鍾意外星人，今次都未放入去。（喺續集加入外星人？）續集就要睇埋呢套反應先。」對於導演指古仔要兼顧演出及監製工作以致精神分裂，他直言：「唔止精神分裂，仲拍到崩潰，因為好多事要處理，例如拍攝CG鏡頭用嘅綠布，買到冇晒，要自己染布，拍完都唔知點處理咁大量物資。」