雅虎香港新聞 【移民英國】寵物點樣移民？大部分業主唔准租客養寵物？
一系列「移民英國」嘅尾聲，最後不過對好多人嚟講亦可能係最重要，就係幫自家嘅寵物移民喇！坊間的確有唔少協助寵物移民嘅公司，不過實際上自己處理其實都唔算太難；但係注意英國脫歐後，要帶寵物移民嘅規定比之前困難，手續上亦有少許分別，今日為大家介紹一下啦！
動物都要有護照？
同人一樣，英國規定每隻移民嘅寵物都要有自己護照，好彩嘅係香港獸醫係英國承認可以簽發護照嘅地方之一。護照之中必須清楚及寫明以下資料：
-主人個人資料
-獸醫個人資料
-動物晶片資料
-動物外型描述
-狂犬病疫苗注射記錄
-狂犬病驗血記錄
-狗隻的話，接受條蟲治療記錄
有護照嘅寵物可以免卻長達4個月時間嘅隔離，另外寵物必須於主人到埗嘅前後5日到達，方能列入為「個人寵物」，一旦超過前後5日會被視為「商業用途」，須交付不同文件及額外費用。
另一樣經常出事嘅位就係有部分香港獸醫如果未填寫過動物護照可能會出現錯漏，而英國對護照要求極為嚴格，一旦文件出錯可能會被打回頭，而通常都係臨出發前10日先知，到時機票訂晒又唔去得，絕對會打亂整個行程。所以建議大家必須詢問獸醫有無呢方面經驗，如果之前填過英國動物護照的話就更有信心。
訂機票須知 只有幾間航空公司可以坐？
英國規定移民人士或寵物都要交增填稅，除非你填上Transfer of Residence（TOR）就可以退稅。要於抵達英國前於網站填妥表格（按這裡）。
幫寵物搞好護照及文件，就輪到坐飛機問題。英國規定寵物移民必須以貨運形式前往，並且由英國指定動物通關公司清關。目前於香港直飛英國而又提供寵物貨運嘅航空公司只有國泰航空及英國航空（漢莎航空只提供有限度服務）。
由於以貨運形式，寵物要入IATA認可嘅飛機籠。購買機票前須提供已委托嘅英國動物通關公司提供參考編號予航空公司，等佢哋運送到去機場之後直接送往清關。一航過程寵物落機就會去到清關公司，由獸醫檢查健康狀態，再觀察下有無不良反應，須時約8個鐘就可以去接返佢哋喇。
移民費用比移民公司平一倍
至於費用方面，如果自己搞的話，計晒機票、通關等費用每隻約1萬（未計獸醫開支）；坊間一般寵物移民公司，通常則貴近1倍，不過當然用移民公司就可以煩少自己填表等手續，亦可以免卻因為手續或表格出錯而導致拒絕通關等問題，視乎閣下財力而定。時間方面預計由填表至完成，大約3至5個月時間。
租樓問題 業主多數唔准養動物？
大家可能覺得外國人好多都養寵物，業主多數都允許租客養寵物？奉勸大家搞寵物移民前必須搵好居所，因為原來英國只有3、4成業主允許租客養寵物！就算係可以容許養寵物，租金一般都會較其他同類嘅高；連帶按金及亦會收得更多，擔心寵物會破壞屋內傢俬。有業主甚至會要求出租前先與你嘅寵物進行「面試」，觀察一下你嘅寵物係咪好貪玩並且會搗亂。
如果閣下成功於英國搵到一間可以養寵物嘅屋去租，就算日後退租都記得問業主拎一封介紹信，證明租期之內寵物無破壞任何傢俬，咁你下次再租其他屋時可以出示畀業主睇，絕對大有幫助。
更多相關文章
【移民英國】職場文化要熟悉 今年失業率或升至15% 點算好？
