約好了如果N歲我們男未婚女未嫁，不如就在一起的5對明星

早前小儀同余文樂被假傳「公開戀情」，余文樂就喺Instagram貼o嘴自拍，仲話「小儀如果我過幾年都找不到對象的話，我們就真的在一起吧！」，呢個承諾唔知余文樂到時係咪真係會找數。不過其實娛樂圈都有唔少明星有過約定，只要N歲時仲單身就會一齊，以下就係有過咁嘅約定嘅5對明星：

舒淇 張震 35歲之約

舒淇同張震合作過好多次，包括《最好的時光》、《天堂口》以及近嚟嘅《刺客聶隱娘》，多次喺戲中飾演情侶。無論戲裡戲外都展現出絕頂默契，因此都傳咗好耐緋聞。有一次，張震被舒淇經紀人睇掌嗰陣話佢無婚姻線，於是大嗌話自己超想結婚，所以舒淇就同佢約定「35歲你還沒娶，我就嫁給你」。不過張震喺37歲同咗拍拖4年嘅圈外女友結婚，舒淇亦有去參加張震嘅結婚派對為好朋友送上祝福。

安以軒 安鈞璨 35歲之約

安以軒同安鈞璨因拍攝《車神》認識，自此成為好友，仲同一班明星組成「安氏企業」。佢兩個感情好到好似姊弟咁，安鈞璨去中國發展嗰陣，安以軒幫佢安排好所有嘢；而安以軒一個電話，安鈞璨就會飛奔去佢到，仲會為佢克服「人群恐懼症」去行夜市。安鈞璨仲曾經許諾，話如果安以軒到咗35歲仲未嫁，就會照負責佢下半世。不過安鈞璨不幸患上肝癌，等到安以軒趕嚟見最後一面，用力同安以軒揮手不久後就去世，趕唔切等到幾個月安以軒35歲兌現承諾。而安以軒喺安鈞璨嘅告別式上哭成淚人，仲約定佢「我們這輩子未完待續，下輩子會再相聚」。

張國榮 梅艷芳 40歲之約

「哥哥」張國榮、「梅姐」梅艷芳係香港人無可能唔知嘅兩位巨星，佢哋合作過多套經典電影包括《緣分》、《偶然》同《胭脂扣》等，佢哋合唱嘅《芳華絕代》更加成為神作，更被認為係最佳拍擋、金童玉女。戲外佢哋感情非常深厚，梅姐搵親哥哥煲電話粥可以講成幾粒鐘；有次有個男人走錯房入咗梅姐間酒店房，自此每次一齊出show，哥哥都會book間相連套房照顧梅姐。有次梅姐心情唔好，問哥哥如果佢40歲都未嫁得出，哥哥會唔會娶佢，當時哥哥一口答應，當然後來哥哥搵到摰愛「唐唐」。而梅姐40歲嗰年，哥哥先佢一步離去，幾個月後梅姐亦因病逝世，兩粒一代巨星就此隕落。

林心如 蘇有朋 40歲之約

林心如同蘇有朋因為拍《還珠格格》而結緣，自此成為好朋友接近20年。佢哋成日一齊食飯行街，不時post合照上微博，感情好到好似屋企人一樣。所以好多Fans都覺得佢兩個好襯，成日想佢哋喺埋一齊。而佢哋都有個40歲約定，話到時男未婚女未嫁就喺埋一齊啦。不過當林心如今年40歲時間，忽然係5月20日承認同霍建華拍拖，近日仲拉埋天窗，而蘇有朋還立即送上祝福。

阮兆祥 梅小惠 50歲之約

阮兆祥同梅小惠一直老友鬼鬼，仲曾經向梅小惠許下承諾話如果佢「50歲未嫁人就娶佢」。今年r啱啱梅小惠就50歲啦，祥仔當然被追問會唔會遵守承諾啦，佢就話同小惠只係兄弟情，就好似家人一樣，並唔存在咩愛情，當時咁講其實只係因為小惠失戀，驚佢屋企人擔心先咁講。而其實祥仔有個拍咗16年嘅女朋友，仲同女友講笑話如果要實踐承諾娶小惠，咁就小惠做大佢做細添。

圖片來源： 電影《最好的時光》、安鈞璨＠微博、電影《金枝玉葉2》、林心如＠微博、梅小惠＠微博