純粹港嘢：最影響友誼的情緒是妒忌

人大左雖然唔可以好似細個咁成日約出黎吹水，但托賴於網絡發展神速，同真心friend 嘅朋友，總會有一、兩個「死黨Group」，大家會改埋一啲只有你地先識笑既Group名，但無論係 Facebook睇到無聊嘢，或者生活上俾無聊人激親，大家都會習慣係個Group到開心/傷心/激心share。

朋友A深夜就用一條好嬲豬嘅message炸哂成個Group嘅人出黎。

朋友A：我真係好唔明！點解有啲人鐘意一邊同你扮到好似好friend咁，另一邊廂不停同你身邊所有共同朋友鬧你？

朋友B：下？我以為你地真係一直好friend。

朋友A講到想喊咁滯：我真係當佢好朋友，但已經唔止一個人同我講要小心佢，話佢係後面不停同我比較，唔抵得我好多嘢好過佢。

我：或者因為你地係中學同學，而家又係同行，但係你好多地方都好過佢，所以佢妒忌掛。

朋友D：我之前有個大學朋友仲誇張， 佢生完B搵唔到地方住，好友E以市價9折租左層樓俾佢，之後一直無加過租。後來E生左對孖胎照顧唔黎，請左個工人。然後我個朋友就勁嬲，覺得E有閒錢請工人，都唔肯減佢租。每次見到E嘅小朋友用貴嘢、一家人去旅行之類，佢個心就會好唔舒服。

以前細個會覺得患難見真情，願意係低谷陪伴自己挨過去嘅一定係真友誼。但人大左會慢慢發現，共富貴有時比共患難更難，願意係你唔開心時陪係你身邊聽你訴苦陪你喊嘅人，未必一定可以係你風光嘅時候真心登你開心。

妒忌心係好多人都可能會有嘅陰暗面，對著距離我地好遠嘅人，我地可能見到人地過得好只會羨慕。但有一類鐘意同人比較，得失心好重嘅人，就無法忍受見到身邊親近嘅人過得比佢地好。尤其如果你唔小心同佢係同一個行業，曾經係同一條起跑線，有共同的興趣或目標，只要你過得比佢好，佢個心就會唔爽。

即使你無得罪佢，即使你從來無諗佢要同佢爭啲咩，即使你真心當佢係朋友，對佢好好，都無辦法阻止到佢唔抵得你好過佢呢個念頭。

因為親近，所以比較。

佢太了解你，既知道你嘅優點，亦清楚你嘅缺點，於是當你得到佢想要，又得唔到嘅機會時，佢未必會諗「這些機會不是我的」，而係會覺得「這些機會根本應該是我的」。然後產生你搶左佢野嘅錯覺，於是妒忌，嬲豬，唔開心。

當兩個人之間有其中一方產生左比較心，而妒忌者因妒成恨，將妒忌化成行動去傷害對方時，其實個段友情就好難返到轉頭。又或者咁講，如果一個人見到另一個朋友過得好時，無辦公真心登佢開心，其實佢個心暗暗地已經唔當對方係朋友。真正嘅好朋友唔只係用黎呻，用黎陪襯，而係應該包含可以發自內心嘅祝福。

鐘意同人比較嘅人其實好難過得開心，因為下下都要比嘅話，任何人都總有機會係某D地方好過你。老土D講句，想要咪自己去爭取囉，妒忌解決唔到問題架喎。呢句說話送比妒忌朋友A既C小姐。

純粹思考題：如果比你發現身邊既好朋友比較心好重，其實有機會唔抵得你過得好過佢，你地雖然相處上好夾好開心，但你仲會唔會選擇繼續同佢做朋友？

TEXT / Diana CHIU