純粹港嘢：有人話女仔過左28就已經無叫價能力⋯⋯

最近係Facebook見到朋友仔Share左一篇文，題目話「女仔過左28歲以上其實已經無叫價能力」，作為一個已經30既港女，睇到題目個心不其然地虛左一野，想即時問下身邊既直男朋友，男人選擇另一半時，係咪真係會因為覺得對方年紀大機器壞而扣分呢？

直男A話，佢岩岩30，無論事業定經濟都處於起飛期，未定性未玩夠，仲好想試下自己溝女既潛能可以去到幾盡，所以選女朋友時，真心會想搵個年紀細D既女仔，覺得就算試左唔岩，都唔會有種拖到對方過左適婚年齡，唔娶好似好衰仔既壓力。

我唔知佢既諗法代表左幾多香港巴打既心聲，但我的確有遇到好多男性朋友，同女朋友拍拖拍左好多年，係對方挨近30時會覺得好有壓力。如果100% 覺得非君不娶既，會開始出現要計劃面對婚姻既壓力。如果十五十六，其實內心深處擔心娶左會唔舒服既，可能會因為唔想拖到對方，驚拖拖下，拖到人地過左30會好難嫁得出，最後決定「及時放生」對方。

無可否認，係現有既社會文化同觀念下，女人既年齡，有時同男人既年薪一樣，會成為異性擇偶時考慮既重點因素之一。當然我地可以選擇站係道德高地，批評睇樣睇年紀既男人膚淺，要求對方有樓有收入既女人現實。但係come on，其實問心個句，就算幾鐘意一個人，當要承諾同對方一齊時，真係可以做到無任何考慮，唔睇任何條件咩？我自問唔清高，會坦白承認自己搵另一半時，就算把口唔講，個心都暗暗有條底線：唔需要對方好靚仔，但最少個樣要咀得落；唔需要勁有錢，但起碼要自給自足。話鐘意就得，唔使計算咁多既，可以問返自己，最初點解會鐘意上對方，真係完全無原因？

呢個世界堅現實，你揀人時人揀你。你想要一個專一風趣對你好既男人，對方何嘗唔想搵到個大方溫柔識煮飯既女仔。

我地可以無條件去愛一個人，但絕對會有條件地選擇對另一個人付出幾多。人會不斷變老係改變唔到既自然定律，而「年齡」會影響所謂既叫價能力，亦係一個雖然殘忍，但無法唔認同既社會現象。

你可以話，唔係喎，我睇報紙見到好多女人，好似賈靜雯、王菲、伊能靜、Vera Wang等等，就算結過婚、生過仔、離完婚又點，最後都搵到屬於佢地既幸福，證明女人就算過左28甚至48，都唔影響叫價能力丫。

無錯，佢地既例子證明，年齡唔係絕對因素，年紀大唔緊要，重要既係要 keep得好自然唔怕老。埋怨世界太殘忍？不如努力成為一個可以好有自信地講：你唔要我係你走寶既女人。

純粹思考題：其實調返轉，女人係擇偶時會唔會介意一個男人太老，男人又會唔會介意一個女人太窮呢？

text / Diana CHIU