網劇《反黑2》承認「因資金問題暫時停拍」 強調短期內恢復拍攝

去年底網劇《反黑2》宣布開拍，第一季主角除李璨琛外都歸位演出，並加入陳瀅、肥媽等人，演員人數近百人﹐陣容鼎盛。但近日有傳《反黑2》因資金問題而要停拍，由於演員檔期本來被《反黑2》hold起，而家停工令多方面都相當頭痛，劇集幾時推出更成為一個謎。

《反黑2》劇組尋日就出咗份聲明，表示「就劇集因資金問題而暫時停拍的情況，我們鄭重向所有受影響的演員及工作人員致以真誠的歉意。但我們強調本劇的拍攝計劃不會因此終止」，似乎間接承認停工傳聞。聲明解釋咗停工原因，「其中一位主要投資者屬海外基金。跨國匯款手續繁瑣，資金的到位時間受到拖延，拍攝期因而受影響。現匯款已順利逐步通過，並於短期內到位。拍攝亦將於短期內恢復進行」。

由陳國坤、李璨琛、陳小春及張建聲等主演嘅《反黑》，2017年推出後反應良好，全球串流平台累計播放達50億次。相隔6年，去年底《反黑》舉行記者會宣佈開拍第二季，由原定嘅32集增加到60集，並加入謝天華、MC Jin、關智斌、吳浩康、陳山聰等演員，原定2025年播出，總投資超過2億港元。《反黑2》獲得同TVB關係密切嘅邵氏注資，TVB高層樂易玲都有出席記者會。

早前有媒體報導，《反黑2》因為主要投資方「走咗」而出現資金問題，導演宋本中要北上向投資者解釋。報導又指劇集原定要拍一年，而家可能要半年內搞掂，劇組希望4月尾可以再開工。

根據《反黑2》facebook專頁發文，《反黑2》今年1月初開工，並每日發布拍攝現場相片，但專頁喺1月底、亦即開工第10日之後就冇再post呢類相。有份參演《反黑2》嘅陳煒表示，一直未收到劇本，但宋本中就澄清，煒哥原定今年中先入劇組，因此無影響。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！