網民出PO揀史上最差CD唱片封面 衛蘭做瑜伽動作最經典 薛凱琪造型恐怖

現時好多人都選擇音樂串流平台聽歌，買實體唱片嘅人真係越嚟越少！其實過去好多設計獨特嘅唱片封面，成功令人留下深刻印象。近日有網民喺討論區以「史上最差CD唱片封面」為題出PO，結果引起網民熱烈討論，而家大家睇下邊期隻唱片被網民指係「差CD唱片封面」啦！

衛蘭《WISH》
今次網民討論度最高嘅就係衛蘭（Janice）喺2009年推出大碟《WISH》，封面中嘅佢做出高難度嘅瑜珈動作，將雙腿返向前，被網民直指封面零美感兼九唔搭八：「Janice個隻cd好久之前係cd舖見過，以為係驅魔人出續作。」、「衞蘭果張太經典」、「Janice嗰個雖然騎尼 但draw到attention已經完成使命」、「衛蘭完勝」、「衛蘭嗰個封面我都一直覺得有啲九唔搭八」、「的確係幾無厘頭」及「當年喺街見到，嚇到呆一呆，差啲唔識過馬路」等等。

薛凱琪《AUGUST GIRL》
薛凱琪（Fiona）多年嚟以鄰家女孩形象示人，不過佢喺2011年推出嘅專輯中大改形象，時玩暗黑型格風，喺黑色做主色嘅封面中，佢望住鏡頭咁半蹲喺白色盒子上，頭上有一嚿不知名嘅物體。唔少網民都對呢個封面拗晒頭，留言「最恐怖我覺得係Fiona」、「扮獅子定盆栽」、「Fiona好似十年冇洗頭咁 果餅野」、「似扮火災現場被燒爛既傢俱」、「我諗起 Juno 套彊屍入面既孖妹鬼」、「我覺得呢隻仲差過衛蘭隻Wish」及「在排便中扮樹」等等。

方力申《在你遙遠的附近》
「飛魚王子」方力申喺2007年推出第七張專輯《在你遙遠的附近》，封面設計簡單，只有方力申嘅大頭照片，配上出晒事嘅「新細明體」做專輯名稱字體，網民都認為封面設計老土及睇落似翻版：「万刀甲 新細明體」、「大陸老翻碟咁」、「新細名體cover.jpg」、「呢隻碟係個design concept好80年代feel」、「重點係新細明體，衰過啲小學生power point」、「除咗字體，張相啲色水加埋雪點背景效果撞埋一齊，就即刻出事」及「成個石修咁樣」等等。

裕美《雪映移城》
歌手出身嘅裕美喺2007年推出首張專輯《雪映移城》，封面中嘅佢企喺草地上，對住鏡頭傻笑，一隻手拖住一隻狗，另一隻手就拎住一隻狗毛公仔。唔少網民都認為封面九唔搭八同裕美個樣唔同咗：「個名叫雪映移城又拖住隻狗，又拎住毛公仔，加埋裕美個表情好似弱智。」、「重點係裕美個樣」及「裕美個樣唔同左勁多」 等等。

JW《Los Angeles》
JW（王灝兒）喺2010年推出首張個人專輯《Los Angeles》，封面以紅色及黑色作為主色，而JW就半透明出現，靈異感覺十足，網民留言話「靈異風」、「升左天咁」、「字體都似先盞鬼」、「扮Lana Del Rey?」及「似係啲靈異小說封面」等等。

李治廷《今天開始》
現時主力北上發展嘅李治廷，喺2009年推出首張個人廣東大碟《今天開始》 ，封面嘅佢脫去上衣，腋毛清晰可見，網民一見到就表示唔like，留言話：「雄風雜誌封面」、「一除走黃色碟套，原來個封面連腳毛都露埋，仲要右下角露埋點」、「設計同cutting都好差」、「靚仔真係唔係大曬」及「啲毛想點...」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！