聲夢傳奇|文凱婷險勝網民質疑有後台 張佳添點評林智樂:觀眾緣唔夠

·3 分鐘文章
文凱婷 & 林智樂
文凱婷 & 林智樂

TVB選秀節目《聲夢傳奇》9強爭7強之戰分成兩集播出,唔再分紅藍兩組,大玩個人賽制,4位學員與5位學員兩組與歌手導師合作,每組各淘汰1名分數最低嘅學員,上星期已播出由林智樂(Felix)配林奕匡、林君蓮(Kaitlyn)配泳兒、冼靖峰(Archie)配馮允謙、及文凱婷(Aeren)配林欣彤出戰,最終由林智樂以11分遭淘汰,不過大批網民替林智樂感到不值,認為喺呢次比賽入面,文凱婷表現失準又走音,被淘汰嘅應該係文凱婷先啱。

林智樂與林奕匡演繹張學友經典金曲《分手總要在雨天》,就連評審張佳添都大讚:「今日係一個靚聲嘅拼盤,兩種唔同嘅溫柔作出攻勢,我係女仔會好冧。」反觀,獲得13分嘅文凱婷同林欣彤表演完《愛是懷疑》後,歌曲嘅曲詞編監亦係評審之一嘅陳奐仁直言:「無show到你嘅唱功!」網民批評賽果有做馬之嫌,認為林智樂唔係唱得最好嗰個,但肯定比文凱婷唱得好,尤其係文凱婷第一句已失準,仲話歌唱比賽係唔應該因為嗰個人好努力而非實力留下,大踩文凱婷嘅表現:「論實力應該早就out出局」、「笑死啦!都冇唱功點show呀!」、「人哋正常發揮得11,佢唱得咁差有13,講冇後台都無人信啦」、「第一句已經走音!每次負碌過關 好侮辱其他被foul而有實力嘅參賽者」、「好難聽呀! 人又作狀! 咁都可以高分過 felix!」及「不死人, 集集都唔明點解唔使foul」等等。

有網民更加封文凱婷做「Aeren傳奇」,指之前被淘汰嘅孫漢霖(火雞)、詹天文(Windy),甚至係首集已被淘汰嘅蔡愷穎(Lolita)都唱得好過佢,但文凱婷每次都可以矇混過關,例如文凱婷喺第二集演唱《木紋》,被評委評價佢無選擇到適合自己嘅歌曲之餘,導師JW更加聽到皺晒眉。近日,《聲夢傳奇》評審張佳添仲出片點評當晚4位參賽者表現,指林智樂聲線辨析度幾乎係所有參賽者當中最高,而文凱婷表現則無驚喜,唔夠力量,佢亦表示林智樂嘅分數偏低令佢好意外,指林智樂嘅致命一擊可能係因為觀眾緣唔夠其他參賽者。

《聲夢傳奇》截圖
《聲夢傳奇》截圖
《聲夢傳奇》截圖
《聲夢傳奇》截圖
《聲夢傳奇》截圖
《聲夢傳奇》截圖
《聲夢傳奇》截圖
《聲夢傳奇》截圖
林智樂
林智樂
林智樂
林智樂
文凱婷
文凱婷
文凱婷(Aeren)
文凱婷(Aeren)

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能