聲稱零收入 投資保守 學友非自用物業賣清 呻做包租公辛苦

歌神張學友被傳早年於金融海嘯中，因投資失利慘蝕一半身家4,000萬。日前他罕有受訪談及經濟問題，自稱近年零收入，投資方面亦傾向保守，所有非自用物業均已賣清，並自爆做包租公很痛苦！

貴為天王的張學友日前亮相節目受訪，自爆有段時間唱歌收入不穩定：「未搵夠，唔知可唔可以維持你嘅生活。」他直言當時要靠拍戲賺外快，甚至成為某段時期的主要收入：「例如我一年拍七部，我知道嗰年收入有幾多，計到我收入有幾多，所以有一段時間係主要收入嚟嘅。」續指後來多了機會開演唱會，才開始減產，電影變成有興趣才接拍。

「樓上漏水又關你事」

談到有傳早年他於金融海嘯中慘蝕4,000萬，要復出搵錢收復失地，他笑言近年全無收入，投資亦傾向保守，現時持有的物業都用作自住而非投資：「所有冇自用嘅物業我都賣番晒出去，所有物業、倉庫都好，住又好、寫字樓又好，都係自己買嚟用。」又稱做包租公好辛苦：「我覺得租畀人好辛苦，窗漏水又關我事，明明打風唔關我事，佢漏水、樓上漏水又關你事，水渠爆咗又係你去整，好多嘢！我份人冇乜安全感，我係要好大安全感。」

向來熱心公益的他，被問如何取捨廣大的邀約？他自認個性被動，但只要符合其理念和能力所及，便會答應請求：「好多嘢我都有自己嘅睇法，但我就係一個非常被動嘅人嚟，我知道咁樣唔啱，我就唔會自己跳出嚟話『喂，點樣點樣』，呢個係我自己睇法。但譬如我好想做，咁啱有人搵我喎，咁我咪做囉！（咁你唔托手㬹？）又唔會完全唔托手㬹，我認同嗰件事，同埋覺得自己做得到，咁我咪做囉！」