【聽晚大結局】《宮心計2深宮計》心腸歹毒太醫學徒林子超原來係大隻仔

image

《宮心計2深宮計》聽晚就大結局,第一次參與無綫劇集嘅林子超(Andy),喺劇中飾演心腸歹毒嘅太醫學徒陳茗風,不但害死帶佢入宮嘅太醫文可謙(袁文傑飾),亦扮宮女大叫「有刺客」陷害鄭純熙(周秀娜飾)同任三恕(馬國明飾)有染同埋設局令鄭純熙小產,雖然最後俾皇后(胡定欣飾)狠下毒手殺死,但一班觀眾都對佢恨之入骨。

image
image
image

劇中Andy係一個身形瘦削嘅陰險小人,個樣奸到出汁。事實上佢係大隻仔一名,練得一身好肌肉。佢曾經同傳媒展示佢心口有大約10cm長嘅疤痕,仲話佢係有先天性心漏,細個嘅時候連體育堂都唔可以上,每年都要去覆診一次。雖然身體有毛病,但Andy冇放棄,反而仲積極面對。佢細個嘅時候就同屋企人講想跳舞,之後仲慢慢去接觸運動。

image
image

Andy係香港演藝學院修讀現代舞文憑畢業,原本諗住之後去無綫做舞蹈員,不過自己又好想演戲,所以就去咗新加坡讀音樂劇。讀咗一年之後,21歲嘅佢就返香港參加now TV嘅主持選秀比賽而入行。做咗差唔多5年主持之後,Andy希望可以跳出框框去試下拍劇同拍戲,所以就算公司叫佢續3年約都冇續。直到17年,終於等到機會加入無綫。

image

為咗可以獲得更多機會,佢用九個月時間去練大隻,更一個月無食澱粉質令自己變得更大隻。遲啲佢仲可以同視帝王浩信和視后唐詩詠拍攝時裝劇《解決師》,唔通大隻仔真係多機會啲?

image
image