【肥媽喪夫】衝動嫁第一任丈夫 前度出軌家暴離婚收場

肥媽遇上第二任丈夫Rick之前，經歷過一段不愉快嘅婚姻。中萄混血嘅肥媽喺少女時代外表亮麗，但係因為情路遇挫折而憤而下嫁第一任丈夫，卻帶來近20年苦難生活。

18歲嘅肥媽本來有個男友，雙方去到談婚論嫁階段，點知雙方家長會面鬧得不愉快，未婚夫於是悔婚。後來結識年長22歲嘅酒廊琴師，肥媽形容前夫「又老又醜又無錢」，仲要同前妻生咗4個仔女，但係一時意氣之下答應結婚，不過對方窮到搞婚宴嘅錢都冇，要肥媽自己出！

婚後一年老公失業，養家重擔落喺肥媽身上，做過唔少體力勞動工作搵食撐住一家八口。80年代，喺夜場做收銀嘅肥媽被人叫上台唱歌，因而被娛圈中人賞識入行做歌手，收入開始穩定，反而引來老公不滿。

事隔多年後，肥媽喺TVB節目《關你家事》重提舊事，指前夫對佢「郁手郁腳」，被掌摑同毆打之外仲試過拎刀仔，又大罵肥媽「你賺錢養家好巴閉呀？」，就連屋企6個仔女都受害。

有一次肥媽海外登台返屋企，見到前夫同家中外傭衣衫不整，捉姦在床之餘更得知第三者懷孕，仔女勸肥媽離婚。肥媽將自己賺錢買入嘅一層樓、私家車同部份現金，分俾毫無建樹嘅前夫。至於4個同肥媽冇血緣關係嘅繼子繼女，亦寧願同肥媽生活。

聽落係遇人不淑，但係肥媽承認自己係婚姻失敗嘅罪魁禍首。因為前夫持家不力，肥媽將責任一一攬上身，搵錢做家務自己搞掂，原來咁做係睇對方唔起。前夫因為喺屋企得唔到尊重，於是出軌兼動粗。