肥媽大爆李龍基那些年吸金能力 「唱一個月買一層樓」呢位TVB綠葉當年同樣好搵得

唔少藝人近年都開設YOUTUBE頻道，就連92歲嘅修哥胡楓都搞咗個網上訪談節目《修哥萬花筒》。最新一集修哥邀請肥媽做嘉賓，大談80年代香港娛樂事業蓬勃時期嘅搵錢風光。

肥媽80年代曾經做過為餐廳酒廊安排歌手同樂手嘅中介工作，每節演出抽佣5蚊，最高峰時期有20個場地由肥媽負責。因為工作關係，肥媽相當清楚當時邊個歌手最多演出最好搵。肥媽指當年好仰慕李龍基同張武孝(大AL），佢地唱一節收幾百至一千蚊，相比其他歌手50蚊唱一節的確收貴好多。

而家觀眾當李龍基係「提款基」，但八十年代嘅基哥就真係「人肉提款機」。肥媽話李龍基當時係揸跑車去餐廳酒廊門口然後上台唱歌，由得警察抄牌，唱完收錢走下場。肥媽直情話李龍基等一眾歌手好有錢，「佢真係唱一個月可以買一層樓。講真！」，而且一晚走幾場，十分風光。

八十年代機會處處，本來做中介搵錢湊大6個仔女嘅肥媽，因為一次機會而升呢做歌手。肥媽有次為某個場合安排樂手，現場有陳欣健、岑建勳（岑寧兒爸爸）等娛圏中人。樂手叫肥媽上台唱歌，估唔到一唱震撼全場，後來更被經理人賞識簽約做歌手，以月薪18000蚊一星期唱5晚，比起原本搵2千蚊一個月賺多9倍。自此肥媽演出機會不斷，成為歌手及演員，輪到佢吸金不斷。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！