自揭選美鬧不和 梁允瑜:「我有整容」

梁允瑜在網上頻道分享選美的難忘事。
梁允瑜在網上頻道分享選美的難忘事。

「粗口港姐」梁允瑜不改有話直說的作風,在個人短片頻道爆料,包括參選時與其他佳麗不和,又承認曾「整容」:「自己開心就足夠,因為整容唔會影響到其他人。」

梁允瑜去年參選港姐時連環爆是非,包括被指貪慕虛榮,連昔日的爆粗短片亦流出,因而被封「粗口港姐」。雖然最後10強不入,但她仍獲無綫簽約加盟,在最近開設的個人短片頻道中,她就分享參選港姐的點滴。

片中她以「男仔頭」形容自己,坦言當時與部分佳麗不和,但慶幸過程中亦獲得真友誼,識到好姊妹︰「你諗吓成班女仔,梗係有啲是是非非嘅嘢,咁舊年我參選港姐嘅時候都同佳麗有不和嘅,當然亦唔係得我嘅,其他人我都聽到八卦吓,知道吓咁樣啦。有時可能係睇唔過眼佢一啲行為,我就覺得啱傾就傾,唔啱傾咪有禮貌打個招呼算囉。不過都有真友誼,唔好睇到港姐係一個爾虞我詐,唔係你死就我活嘅心態,唔係咁樣嘅!」

等機會做出成績

加盟無綫後,梁允瑜直言因競爭大,要思考如何突圍而出:「TVB真係好大競爭!因為次次去到化妝間,素顏都有好多靚仔、靚女,但係我就唔會諗點樣上位,我諗應該係話點樣突圍而出。娛樂圈係你等待嘅時間好長,你需要等個機會來臨,所以你可以做嘅就係好好裝備自己,當機會嚟到就好好把握,做到啲成績出嚟,係對自己最好嘅交代。」

她又承認曾經「整容」,包括「啪骨」改善面形,又指視乎大家如何定義「整容」:「依家箍牙同整雙眼皮都係整容,如果箍牙都計,咁我係有整容嘅。以前我係爆牙同哨牙,我有打『黑眼圈針』,因為有千年黑眼圈。自己開心就足夠,整容唔會影響到其他人,最緊要自己開心同埋安全。」

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能