與Hillary甜蜜認愛 洪卓立發憤 要女友貪慕虛榮

英皇歌手洪卓立（Ken）脫單成功，公開承認戀上「ViuTV女神」劉沛蘅（Hillary），形容兩人的感情生活相當愉快，Ken揚言要努力搵錢培育女友化身成「貪慕虛榮」女生，Hillary則澄清自己非千金小姐，兩人關係不會建基於金錢上。

洪卓立被爆暗撻劉沛蘅，兩人感情發展到一日千里，早就升溫至同居關係，但為怕戀情曝光，兩人平日出入都極之小心，總是採取前後腳扮作不認識，然後閃身入去居住的大廈。不過日前他們終被本報捕獲，雖然全程沒有任何親密動作，兩人有默契地頭耷耷急步而行，但就被頭上的情侶帽出賣。翌日Hillary戴上Cap帽、身穿白色短袖Tee配牛仔褲街坊裝現身，見她提着一大袋約2人分量的午餐外賣，急步回家與男友撐枱腳。

與女友財政獨立

同居關係被踢爆，Dry足3年的Ken終於大方承認戀情，他在社交網上載家中3隻狗仔齊齊在梳化的溫馨照，對女友Hillary讚不絕口的他形容兩人一齊很開心，他寫道：「多謝大家關心。佢係我見過最善良最有愛心嘅女仔，我哋每一日都好開心。」對於有指女友放下富家女生活，甘於蝸居在他位於大圍的舊樓寓所，他則說：「其實呢個單位買咗好幾年，我哋亦都係財政獨立，我好開心睇到佢嘅發展，而我自己一直都有工作在身，識我嘅朋友都知我從來都靠自己。」

Ken對千金小姐女友Hillary化身做外賣妹，他即幽默回應：「當然我會努力，令她成為『貪慕虛榮』的人。」Hillary待男友親證其女友身份，即甜蜜回應戀情，但強調自己非富家女，她說：「多謝大家關心！我哋每一日都好開心！我覺得任何關係都唔應該建基於金錢上，最重要係用心去交流、溝通，而搵到一個能夠互相支持大家嘅人係好難得。我真係唔係一個富家女，一直都要努力工作，希望大家畀番少少空間我哋。」