苗僑偉去完火星 欽點翠如濕身

已故藝人翁美玲38年前與苗僑偉合演的經典劇《天師執位》重播，苗僑偉前晚錄影《開心無敵獎門人：終極篇》時，笑指《天》是「粵語長片」，好得人驚不敢翻看，又點名黃翠如在《開》濕身吸收視！

久未露面的苗僑偉，前晚偕黃宗澤（Bosco）、黃翠如及洪天明等逾20位藝人錄影《開心無敵獎門人：終極篇》，剛從加拿大返港的他笑言之前去了火星：「返咗嚟幾日，第一個工作就係上《獎門人》。」Bosco自爆：「三哥（苗僑偉）約食飯，但我約咗舊同學，佢竟然叫我推咗佢，唔使咁惡啩！」苗僑偉笑說不信Bosco約了同學，Bosco即表示有相為證：「如果真係約咗女仔，反而會推！」

唔敢睇陳年舊作

苗僑偉38年前與翁美玲合演的劇集《天師執位》近日重播，當年收視高達60點，他說：「當年睇電視係大家唯一嘅娛樂，主題曲仲播到今時今日。我真係唔敢翻睇，好得人驚！Bosco同我講重播，我問佢做咩唔瞓睇粵語長片。」談到《開》的遊戲，他笑說：「啱啱喺火星返嚟，驚反應唔切，啲濕身嘢留畀黃翠如啲女仔負責，要幫助收視嘛！」

黃翠如聞言即「交波」給陳自瑤：「交畀我有啲困難喎！陳自瑤就大家都知喇！佢有冇着透透哋嘅衫？」又指苗僑偉返港令她好感動，因可再度跟他跑步，問是否想操Fit造人？她說：「想再健康啲啫！（練氣助陣蕭正楠音樂會？）我唱過畀佢聽，哼咗幾句《因為愛情》，佢話唔合格。」

同樣剛返港的洪天明透露離港達15個月，會逗留至農曆新年後，計劃舉家與父親洪金寶到日本旅行，又表示早前因染疫而未能返港，太太與兒子也中招：「我有叫太太考慮帶埋兩個仔移居上海，方便我喺杭州工作。」