莊韻澄失聯20分鐘準前夫即報警 IG出Story控訴：我唔明點解係都唔放過我

42歲莊韻澄（前名莊端兒）喺上月26日宣布與經理人老公呂成忠（Joe）正辦理離婚手續並已正式分居。之後二人就展開隔空罵戰，雙方各有指控。喺噚日（13日），莊韻澄喺IG出Story公開二人對話截圖，力斥呂成忠。

莊韻澄公開嘅對話截圖中，呂成忠要求開FaceTime、影相及拍片報告囝囝嘅實時狀況，而莊韻澄就指：「21:46冇聽電話，同埋電話又影相又拍片又睇片已經過熱，我之前水上樂園條片就係咁過熱，拍到疾疾吓。」、「22:12工人話警察喺屋企門口，我媽對腳唔好又咁夜，我連近近地車我媽返屋企嘅權利都冇呀！來回都係15分鐘左右」、「佢頭先仲喺我樓下呀！我同BB都好驚」。

之後，莊韻澄再以影片形式公開二人對話，呂成忠就話佢用自己可以保護BB嘅安全方法，仲話有警察陪佢喺樓下超過20分鐘等等，而非常不滿嘅莊韻澄就反擊話搵唔到20分鐘就報警，連佢自己都差啲以為自己失蹤咗20個鐘。莊韻澄又以自拍照作為背景出IG Story，寫上「我都好想可以放低電話專心湊仔，我唔明點解係都唔放過我，一係唔俾人食飯、一係唔俾人瞓覺、一係唔俾人湊仔，每日都搵樣嘢嚟騷擾我，咁得閒去諗點樣去搞我，不如你好好地搵嘢做，做好你自己啦！」

另外，佢仲以黑底白字出IG Story，表示：「過去為咗小朋友我忍，邊個唔想俾個完整家庭小朋友，否則我就唔會忍咁耐啦！而家我都係為咗我小朋友要去克服去面對，好多人問我點解唔block佢，因為我只不過冇聽2個電話或者30幾分鐘聯絡唔到我，啲人就會去報警囉。我而家就喺度講到明我係會出去工作搵錢養家，我係會帶仔去玩去正常返學上堂同各種活動，見唔同朋友有正常社交，我都會自己同朋友見面食飯，而我唔喺我仔身邊嘅時候一定會有工人姐姐同婆婆睇住，舅父舅母又會一齊幫手睇，基本上佢哋差唔多晚晚一齊陪我同BB食飯，BB真係好開心。而我屋企人真係好擔心我呀，不過我真係同大家講聲唔好意思，我好少放負...我好想之後放多啲工作相開心相同BB嘅相，我會加油。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！