菊梓喬社交平台TVB聯絡方式消失 臨走前跌親骨折被指另有所指？

TVB嘅藝人逃亡潮，疑似擴散到旗下TVB MUSIC(前稱星夢娛樂）歌手！早前有報導指，曾被稱為「星夢一姐」、36歲嘅Hana菊梓喬都萌生去意，據報佢打算喺年底約滿後離巢。以獨立歌手出道嘅Hana，有意成立工作室自立門戶。

近期菊梓喬IG帳戶上列出嘅工作聯絡帳戶，都係以歌迷會名義，完全唔見同TVB聯絡嘅對口單位。早前陳凱詠離巢前後，IG嘅工作聯絡電郵地址都係以佢英文名Jace組成，傳媒估計Jace會獨立發展，結果真的如此。因此，Hana嘅聯絡方式有變，佢同TVB嘅關係可見端倪。

而Hana呢期仲有多樣嘢處理，就係隻腳。佢尋日post咗自己左腳綁滿繃帶嘅相，仲話「早前不小心跌下來骨折受傷 ／但是大家不用擔心／一切如常舉行」。有人留言揣測斷腳係咪暗示「斷開一段關係」，吓？

本來簽約細公司創富文化嘅Hana，2017年由時任星夢話事人何哲圖Herman邀請過檔，加盟後備受力捧，獲安排主唱多首劇集歌曲，甚至奪得勁歌金曲最受歡迎女歌星。但2021年曾志偉加入TVB管理層，有傳Herman同掌管TVB綜藝嘅老婆余詠珊失勢，兩公婆並於曾上任不久之後相繼辭職。

據報Herman離職前，一眾星夢歌手都焗住要續約2年。但喺曾志偉上台後，TVB力推「聲夢幫」，炎明熹、姚焯菲等一班小花備受力捧，Hana由星夢一姐變成坐冷板凳，就連年初嘅《中年好聲音》參加者都有聲勢過Hana。前後夾擊加上靠山盡失，就連死敵吳若希早前受訪都唔客氣，講明唔想同Hana同台，擺明唔妥，「菊姐」唔走盞受氣。

Hana以外，喺星夢同樣由Herman照住嘅周柏豪同胡鴻鈞，都已經先後走人。而Hana最新歌曲已經係一年前推出，佢近期工作主要係北上拍內地音樂真人騷，同埋喺內地開個唱。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！