萄葡友：今日女神唔矜貴 齊來朝拜昨日女神！

時下嘅網民郁啲就封呢個係宅男女神、嗰個係性感女神，令到女神呢個詞泛濫同埋唔再矜貴，同以前嘅女神真係完全唔同級數。好似48歲嘅王馨平，當年憑住《別問我是誰》一曲紅遍港台，加上外表清純甜美而被封為女神。可能婚後養尊處優得耐，近年時不時都會出現係幕前，但前日係一個慈善籌款節目上面唱首本名曲，竟然嚟一個中門大開，唔止露出事業線、直頭係低胸低到落條腰到。雖然佢保養得相當唔錯請哂大家眼睛吃冰淇淋，但對於由多年前睇開佢嘅觀眾嚟講，都不禁會問「使唔使阿」同未必想佢咁樣著囉，好多人都大呻「玉女」變「肉女」，好惋惜咁話。

王馨平、周慧敏、鍾楚紅等等都係一代女神，同時下一街都係女神差好遠，咁對於你嚟講昔日嘅女神又要具備乜野條件呢？

外表漂亮

叫得做女神外表要靚一定係先決條件，例如係眉清目秀眼大大、皮膚白晢、 一頭長髮，雖然身材唔一定要好勁爆，但睇落要均稱而且絕大部份人都覺得佢靚先叫得做女神。

溫文爾雅

除咗外表之外，內涵亦都好重要。每當佢行出嚟嘅時候，都應該有種高貴大方、一舉手一投足都散發住優雅嘅氣質，而且談吐仲要有禮得體。假如一個女仔成日都粗魯又講粗口，仲點會有魅力？

有智慧

外表可以吸引到你嘅眼球，但有學識有知性嘅內在先吸引到人心。有知識有智慧嘅女性最吸引嘅地方係由佢嘅說話中感受到佢嘅自信同思想，唔會只係單純一個花瓶。

獨特性格

性格同樣係塑造一個女神嘅要素，可以係開朗、不拘小節、意志堅定、溫婉、或者係近好興用嘅形容詞貼地等等。不過真正嘅女神都會同世俗唔太一樣，帶點冷酷又不食人間煙火嘅感覺。

相片來源：TVB網上截圖