葡萄友：公司睇起你？洪永城由旅遊王子變傻仔

大台新劇《味想天開》由災難級演員蔡思貝搭洪永城，再加「偷食裕美」不知名男角，呢個無敵鐵三角嘅組合，果然無大家失望，播放一個星期，觀眾幾乎一面倒覺得此片爛無可爛，倉底之中嘅倉底。尤其洪永城最令人心嗡，原本洪永城做開旅遊節目，形象健康，談吐風趣，輕鬆駕馭主持一職。不過大台有人就要使到盡，強行搵佢去拍劇，奈何之前幾套《白色天使》、《張保仔》等都負評居多，今次仲慘，要飾演一位痴痢筋嘅食神！果然一出街，大街都劣評洪永城呢個角色無厘頭、口齒不清，唔好笑又唔好睇。有時做人返工都一樣，老細睇得起你，上位有望，但偏偏就要做吃力不討好嘅工作，隨時畀其他人當小丑一樣咁笑，呢個時候究竟應該用咩心態去面對呢？

天將降大任於斯人也

必須熬其筋骨餓其體膚，所以潛台詞就係話：頂硬上！當係一個上天對自己嘅考驗，愈難哽愈要頂上，一方面畀老細睇到自己有幾硬淨同接受到壓力，另一方面當畀自己一個挑戰都好！

堅持唔做（借啲意搵理由）

想唔做都得，不過必須好有技巧，例如提出其他方案，不過醒目仔嘅話當然唔係話老細條橋唔掂，而係覺得自己喺另一範疇更有發揮（自己創作啦仲要教咩）；總之務求甩身之餘又顧全到老細體面。

做個唔稱職嘅小丑

做係照係，不過特登Hea做，甚至諸多出錯，等老細都覺得你唔適合做，繼而提出放生你；呢個做法好處係唔使自己出口，既表現到自己聽話又可以避免做小丑；不過另一方面可能會影響老細對你能力嘅觀感，要小心拿捏。