葡萄友：外表乖巧 識氹男人 最容易吸引男性具備嘅元素

今年28歲嘅黃心穎早排就被發現同大佢15年嘅馬國明約埋一齊睇戲， 而兩人仲隔空對話，黃心穎係出席活動時更坦言話對馬明有感覺之餘，仲大讚佢係孝順好仔，就算悶都有悶嘅好，同樣馬明亦話心穎好爽朗唔會刁橋扭擰似乎有機會發展。不過原來港姐亞軍嘅佢桃花相當旺，同唔少圈中人傳過緋聞，好似係前年就傳過佢同李思捷關係親密，坐車番去對方屋企之外仲同李思捷媽媽食飯；另外又同已婚嘅王浩信係大陸拍外景期間好親近，仲激嬲王浩信老婆陳自瑤添。

到底係黃心穎嘅桃花運旺盛，抑或係自己積極製造出嚟搵個啱自己嘅另一半就不得而知啦，但你地身邊又有無啲女仔係呢種類型，好易同男仔玩得好埋吸引到佢地？

性格爽朗

男仔有時都幾怕啲成日扭扭擰擰，樣樣嘢都拎唔定主意咁，又或者決定咗嘅又轉軚，仲有經常事無大小都要人氹。所以有時啲話一就一、二就二嘅爽朗女仔會反而得男人心，更受歡迎。

鍾意男仔興趣

如果你叫男仔去同你研究美容化妝或者煲泡菜劇，相信絕大部份都無乜反應同投入感。但最近開始愈來愈多女仔會睇波(唔係淨睇球星同問乜嘢係越位)同打機(可能仲勁過男仔添)，咁就中哂男仔嗰籠嘢啦。

楚楚可憐

男人都總會有種想保護弱小嘅基因係度，當佢哋遇到啲比較柔弱、楚楚可憐又好似好需要人幫嘅嗰種女仔時(不論個女仔係咪扮出黎)，自然會發揮佢地嘅本性，有種想照顧對方嘅感覺係度。

外表吸引

男性都係視覺嘅動物，佢地經常性都會被佢哋睇到認為吸引嘅野而去行動。如果個一個女仔外在都幾唔錯，仲要識得打扮嘅話，自然勁like，再加上頭先講個幾種元素，自然好似一嚿男性磁石咁。

相片來源：jacqurlinebwong @IG