葡萄友：態度差 價照加 的士加價至起錶$24

日前政府宣佈的士加價正式獲批，紅的起錶由$22加至$24，加幅近10%，其實搭的士嘅朋友仔，理應都唔緊張加$1、$2，只不過的士司機同市民嘅關係，好似永遠都係對立面，從來未得予過舒緩。今日又有一單新聞，警方以放蛇行動，又成功拉咗一位黑的司機，濫收車資近4倍，而且呢位司機自2012年開始，已經先後2次因同樣罪名被罰款。你話今時今日咁嘅服務態度，仲要加價，市民大眾又點會心甘情願先？雖然好嘅的士司機確實唔少，大家唔可以以偏概全，不過事實上的士司機又真係好多時候令人非常憤怒！

永遠唔過海

呢個一定係第一大問題啦，永遠喺街上截嘅的士，一話過海個個都耍手擰頭，會以「香港車」、「九龍車」嚟作為拒絕原因。大佬個個搭的士都係想趕時間，仲去邊搵個過海的士站先？拒載仲大條道理，嬲呀！

長短途都唔載

唔少人都應該試過被冚住旗嘅的士大哥，打開車窗問你「去邊？」呢個時候真係天人交戰，諗住近近地實去啦，唔去；長途有錢賺啦，又唔去！其實佢哋想去邊？嗱，根據的士司傅透露，最理想價錢係$70至$80，計啱個Range先好「打擾」佢哋啦。

打機睇片開車

宜家多咗好司機係「機王」，即係十幾陪電話放晒喺車頭，一時接Call、一時通訊App、一時打機、一時睇片，真係唔係揸車但作為乘客仲驚過佢！更甚者有人睇住足球直播開車添呀！

濫收車資

呢樣就對遊客多啲，好似上文案中所述嘅司機，明明唔需要跳錶嘅距離，竟然收$100；雖然話呃遊客居多，但有時深夜時分甚至比較難截車嘅郊野地方，司機一樣會唔跟錶而直接開價！