葡萄友：科學家研究 收花對女士身心有實際幫助？

首先祝大家今日情人節快樂，有無情人一樣開開心心！今年情人節寧舍有氣氛，事關喺星期二，即係話返工日子，大家又會陸續見到有同事收花啦。然後夜晚出到街，街上又一對對情侶手執鮮花，大曬幸福。好多朋友都會覺得「送花無需要」、「嘥錢」，甚至有調查指女生最唔想收到嘅禮物第一位就係花（不過女人口不對心是常識吧），好多時送花已經係人有我有嘅象徵喇。不過當然，男士角度去睇，送花基本上除咗令伴侶喺公司同事面前同途人面前威威之外，基本上係無甚作用；不過諗深一層，男士送花畀女士，係近千年來嘅傳統習俗，難道一千年前都有「放閃」、「曬命」之用咩？非也非也，原來「花」呢樣物品，對女士有莫大身心益處架。各位女士，如果你男朋友／老公係咁諗咁講「花好無用」，不妨畀呢個由一眾科學家研究得出嘅結果佢哋睇啦。

啟動人類開心情緒
心理學期刊《Evolutionary Psychology Journal》就做過研究，人一旦收到花，就會產生由心而發嘅笑容「Duchenne Smile」，有別於平時影相時嘅刻意笑容，Duchenne Smile係指人類不自覺地嘴角上揚，臉頰提升嘅真心笑容。科學家指人類自古以嚟對「花」嘅聯想都係開心、恭賀，所以現今人類一收到花就會自然啟動潛在嘅開心情緒，甚至不自覺去與其他人更親近，而且並不止於送花者。

花令男士更具吸引力
法國西布列塔尼大學心理學教授就做過若干行為測試，發明同「花」有聯繫嘅男士會更收女士歡迎，包括將女士分為兩組，然後先後進入一間房見同一位男士，而分別係其中一組，男士四周圍放滿鮮花，然後結果發現，有花嘅一組，男士更受女士歡迎。另一個測試，一名男士喺商場內3間店門前向途經女士搭訕，分別係麵包店、鞋店及花店，結果於花店前嘅成功率比其他兩者高。

減少壓力及不安感
研究員做嘅測試分別對三組女士送上鮮花、蠟燭及水果，結果收花一組女士事後嘅腦部異常興奮，所有不安及壓力情緒通通消失，全部只剩下正面嘅情緒，證明花的確可以令女士更加開心架。