葡萄友：土生土長香港人2017新年願望

新正頭，當然要許下新年新願望，好多人覺得香港好好，國際大都會，生活多采多姿，樣樣不缺；但同樣亦有好多人對香港已經非常失望，好多時對現實有所抱怨時，就會得到其他人一句：「咁唔鍾意咪移民囉。」近日討論區就有人發起香港人2017願望，當中唔少都係地道香港仔嘅心聲，以下幾點，又係咪代表到你？

樓價下跌

首要大事，香港人目前已經為樓死為樓亡，好多年輕人嘅夢想根本只係一層樓；然而香港樓價長居世界第一高位，要不吃不喝18年先買到一個小單位，新年第一個願望係上車，相信無咩人係反對啦。

少啲喼神

今年過年，大家又繼續要周街避喼喇，無他，今年新年假期來港自由行急增近7%，齋計內地客已經有62萬人，其他地方遊客只有16萬。香港人嘅怨氣同街上嘅大陸旅客數目成正比，大家都不禁想問一句：說好的杯葛香港呢？

有個好特首

特首跑馬仔之戰日日上映，香港人雖然無得投票，不過食住花生總算一種娛樂，大家都希望新任特首可以打破現有困局，多啲為香港人服務，新嘅政策都希望係港人優先，唔希望再係阿爺嘅橡皮圖章。

加人工

踏入2017年乜都加價，衣食住行樣樣加，偏偏人工呢又放晒風只會加3-5%，每年一到呢個時候，一班「人力顧問專家」就會出嚟講「市況唔明朗」、「經濟前景未明」等等嘅理由，出盡全力壓香港人價。