蓋世寶回巢與譚玉瑛及黎芷珊主持新節目 網民：食老本食到2047

蓋世寶（LuLu) 被譽為譚玉瑛接班人，曾經係《閃電傳真機》、《至Net小人類》及《放學ICU》等兒童節目主持人，但2015年無綫進行大改組，所有舊主持都被調走，而蓋世寶就被安排拍劇淪為「大茄」。去到2019年，LuLu因被無綫要求減人工，感到心灰意冷而決定離開效力23年嘅娘家。之後，佢除咗做活動司儀之外，亦都有為ViuTV及開電視擔任主持及拍劇，例如主持《一曲走天涯》及客串早前hit爆嘅《大叔的愛》。

早前無綫搵「獎門人」曾志偉同王祖藍返嚟坐陣，並進行一連串嘅改革，而其中一個新節目就係以「童你一起長大了」為主題嘅節目，有傳節目會由譚玉瑛、黎芷珊及蓋世寶擔任主持。

報道指新節目以「童你一起長大了」為主題，並由譚玉瑛、黎芷珊及蓋世寶擔任主持，佢哋會邀請唔同年代嘅主持人上節目，並按照唔同嘅主題去分享過往嘅點滴。另外，佢哋仲會去唔同嘅學校，與同學仔玩經典嘅刺激遊戲。譚玉瑛喺接受傳媒訪問時就已經承認會主持新節目，仲話會嘗試搵周星馳及鄭伊健等出席活動或拍片。

對於蓋世寶回巢，一班網民似乎唔係太支持，紛紛留言話：「明明大叔的愛客串開咗少少靚頭 咁睇唔開返去CCTVB」、「無X骨氣，tvb會出幾錢人工呀」、「無骨氣咪呢啲囉，不過仲睇tbb？」、「食老本食到2047」、「所以呢啲人係唔值得可憐」及「食回頭草都係要under肉英姐姐」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！