薛影儀唔聽話被炒拖累林寶玉 黃榕被傳「正式接管」幫阿儀搵job

每次見親薛影儀同林寶玉，都會諗起陳年港產片《龍的心》，不過世上又邊有咁多成龍呢？

最索經理人林寶玉上周宣布辭職，由於之前亞視一姐薛影儀喺IG留言甚至出post爆粗鬧爆寶玉，寶玉有樣有身材又有生意在手，唔撈只係遲定早。

不過今日有傳媒爆料，寶玉唔撈嘅真正原因，係因為所屬公司AMM決定將雪藏中嘅冰格，直接掟落鑊 － 即炒！既然冇藝人要湊，寶玉又何來係經理人呢？AMM本來想安排寶玉調職，而寶玉就決定自行告退。

阿儀嘅「一姐」之路由參選亞姐以泳裝示人開展，前後2年零3個月，總算比豬肉威威襟玩。據報導話，9月底被雪藏之後阿儀同張致恆唱到嘔嘅名曲一樣－死性不改，令AMM決定「忍痛放棄」。阿儀當日簽約時，有報導話合約期係2年，假如屬實的話，死約期已過，AMM應該可以一毫子都唔駛俾。

阿儀變返自由身，邊個最開心？可能係今期密友黃榕。以往超有魄力年年出寫真，近年亦咬實牙關操肌嘅黃榕，對阿儀一樣情比金堅。阿儀同黃榕friend咗之後，被傳成日做「義工」，應收錢出嘅活動同ig post都免費出，但係阿儀力撐黃榕性格好好，反而鬧爆寶玉「性格好差」，甚至話對方係賤x！既然兩脇插刀到呢個地步，而家阿儀冇嘢撈，有傳黃榕好唔話得，幫手send訊息俾電視台高層搲撈，但為免惹是非，據聞各方都反應冷淡。唔知黃榕會唔會試下搵林家棟？

林寶玉宣布辭職後接受訪問，踢爆阿儀原來試過有3次要做嘢但唔見人，次次都係同黃榕去玩就無影，仲話阿儀IG帳戶被盜用。「義工」以外，寶玉當日甚至要同黃榕夾期搵阿儀做嘢，咁黃榕同寶玉嘅角色真係做到無縫涵接喇。「好人」黃榕喺報導出街後即刻喺IG打出三點……回應，而寶玉就再回應，話榕姨嗰三點同佢想表達嘅意思唔相關。

相信以後黃榕同阿儀會孖公仔咁出入，可以考慮拍返套《榕的心》丫，反正得閒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！