薛影儀撐好友黃榕 再鬧經理人林寶玉「行為唔好」 網民：無寶玉你有今日？

近期亞視一姐薛影儀（阿儀）被指因為唔聽公司話而被雪藏，同被稱為「至索經理人」嘅林寶玉關係亦惡化。呢期同阿儀玩得好埋嘅黃榕成為導火線，甚至有傳阿儀結交損友，而且有人疑似利用阿儀名氣幫手出席商業活動同出post，變相「做義工」。

消息傳出後，阿儀多次喺IG澄清，尋日佢亦再三發文強調冇誤交損友︰

阿儀認為公司因為去年佢無牌駕駛電單車嘅案件嬲黃榕，並力撐「黃榕佢d脾氣,性格都好好呀！」。反觀對經理人林寶玉，阿儀就冇咁幫口，直斥寶玉「佢性格,脾氣,行為唔好」，甚至踢爆寶玉帶佢出席社團活動！

唔少網友都認為阿儀唔抵幫，甚至話「無寶玉你有今日？」、「你再咁落去好快失業 聽寶玉話啦」。有人質疑阿儀呢個post一面倒大讚黃榕，係咪有人代筆，而阿儀嘅戶口就回應留言話係佢寫嘅。至於事件關鍵人物之一黃榕亦有留言俾心心emoji，但就一面倒俾網民鬧爆。

阿儀經理人林寶玉今日都有回覆傳媒指「尊重阿儀的選擇。」至於被問到係咪嬲咗阿儀，佢就冇正面回應，反而話自己嬲唔嬲唔重要，都係工作，未必每個人都鍾意自己，尊重每個人決定。另外，對於阿儀嘅工作安排，佢就話未收到下一步指示，都係要等公司指示。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！