被李家鼎黑面後報復？安德尊寸爆「夠鐘喇鼎爺」 靠呢位靚女緩和氣氛

《流行都市》近日新增全新環節「鼎爺家常菜」，由李家鼎一連十星期教家庭觀眾煮餸。鼎爺向來心直口快，對住喺節目多口又串串貢嘅「大王」安德尊，當堂好有火花。大王喺李家鼎煮食時嘈嘈閉，令鼎爺不時黑面，仲呼喝安德尊煮餸落油要「快啲快啲」。輸人唔輸陣，安德尊之後受訪講起疑似黑面事件，安德尊劈頭就話「火，梗係火啦」！

早前另一集「鼎爺家常菜」，除咗有鼎爺同大王之外，仲有《愛．回家之開心速遞》嘅Bonnie林凱恩。今集煮嘅係銀魚蝦乾蒸茄子，大王繼續嘈喧巴閉插咀，要幫手落調味又講廢話，鼎爺都忍唔住自己落手好過。大王又問鼎爺銀魚仔有鹹味點解仲調味，鼎爺都忍唔住勞氣回佢「浸咗幾耐呀？！」。

之後蒸茄子夠鐘出爐，安德尊唔知有心定冇意咁嗌「夠鐘喇鼎爺」 ，李家鼎聞言立即話「鼎爺未夠鐘吓嘛？」再怒睥，大王立即肴底，好在林凱恩幫手兜返「時間夠喇」。鼎爺可能都氣頂，之後安德尊幫手燒熱滾油，鼎爺都串大王手忙腳亂「快手啦，又要搶住做」。

對比大王，主持經驗唔算多嘅林凱恩反而睇得舒服，連鼎爺都肯同佢有問有答，連網友都覺得林凱恩表現好過安德尊！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！