被逼供漏口風 馮盈盈心急脫單 搵林盛斌做媒

·2 分鐘文章
馮盈盈自爆已經搵咗林盛斌介紹筍盤,有望脫單!
馮盈盈自爆已經搵咗林盛斌介紹筍盤,有望脫單!

單身一陣子的前港姐馮盈盈前晚現身綜藝節目時,被陳敏之逼供追問感情狀況,她表示正等待真命天子出現,但又自爆已主動搵「媒人王」林盛斌,明顯心急想脫離剩女行列!

馮盈盈、陳敏之、邵初、阮兆祥等前晚為無綫真人競技綜藝騷《識貨2》開工,適逢敏之43歲生日,製作組送上蛋糕,藝人亦齊唱生日歌,氹得壽星女非常開心!早前踩入NFT(非同質化代幣)市場的盈盈上節目「偷師」,透露生意不錯:「我都仲有啲存貨嘅,主要係藝術品同水晶手鏈,貨品有平有貴。(想主攻做生意?)努力學習中。」問到何時再入劇組?她表示要等公司安排,敏之即打蛇隨棍上:「咁有冇拍拖?」盈盈笑指要等多陣,記者提議她搵林盛斌介紹筍盤,她說:「有搵,佢話送個新年禮盒畀我囉!」

敏之自言不介意在工作中度過生日,更將連續開工3日,絕對是好兆頭,寄望日日有工開,問到老公及兒子有何表示?她說:「個仔畫咗幅好靚嘅畫畀我,老公呢排鑽研緊香薰,佢送咗個好靚嘅香薰擺設畀我。(佢係咪想做呢方面生意?)我覺得佢會,仲叫我一齊去讀有關課程,之後研究吓點帶貨。」

邵初想拍劇

至於應屆港姐季軍邵初對於早前於節目意外犯規自責爆喊一事,她說:「我唔知道唔可以咁樣揀貨,呢個係我參選後第一個騷,作為新人希望盡力做好啲,擔心自己做錯令大家重拍,好在個個都好體諒,最後冇事。」談到節目中表現,她坦言還有進步空間:「下次有機會再會好啲,會畀自己80分。(覺得自己口才叻唔叻?)還可以,但未夠好。(想向綜藝方向發展?)朋友話我有綜藝天分,好搞笑,劇集我就未試過,有機會都想嘗試吓!」此外,阮兆祥於遊戲環節表現雞手鴨腳,連為電話解鎖都有困難,之後致電向母親求救,沒料阮媽媽竟豪氣表示:「買晒佢,我攞一千萬出嚟買!」笑爆全場。

邵初自覺在節目中的表現還有待進步。
邵初自覺在節目中的表現還有待進步。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能