小朋友放電之選 港九新界都有 親子餐廳推介2023版

唔少一家大細放假都會選擇去親子主題餐廳，小朋友有得玩、家長們又可以醫肚。近年唔少親子餐廳更各具特色，例如裝修走北歐簡約風最啱打卡，有唔同主題玩樂區畀小朋友邊玩邊學，更有位於海邊嘅餐廳畀大小朋友一齊玩沙！記得有心水餐廳可以利用收藏功能 Bookmark ，或者用 OpenRice 搜尋當中嘅「嬰幼兒設施」條件，搵更多親子餐廳！

港島區

鰂魚涌 北歐簡約風餐廳 Jello & Mellow

今年六月最新開張嘅親子主題餐廳，裝修以北歐簡約實用美學為主，粉嫩色系加上大玻璃窗嘅自然光，感覺溫暖療癒。分為五大空間，The Mello Dining Room 有玩樂設施同堂食座位，而 Positivi-TEA Room 將會不定期舉辦互動工作坊。

地址：鰂魚涌英皇道1001號1001 King's Road 9樓
面積：約 5,700 平方呎
設施：Jello Kitchen，Main Dining Room，The Mello Dining Room，Secret Garden，Positivi-TEA Room
收費：收費及開放時間表

鰂魚涌 粉色系西餐廳 Q Time Cafe

2021 年開張嘅親子餐廳，以木系同及淺藍色為主調，加上枱與枱之間空間合理，坐得舒服。唔少媽媽都大讚餐廳好貼心，除咗 Play Corner ，更有三間獨立房、嬰兒床、哺乳室等，帶新生 BB 去都可以食得放心！小朋友就可以參加自製薄餅工作坊化身小廚神。

地址：鰂魚涌英皇道1001號12樓01室
設施：玩樂區，嬰兒床，哺乳室，換片房，泵奶機，暖奶器，UV 消毒機
收費：不收入場費，兒童餐及其他餐點收費可參考餐牌頁面

北角 8 大主題玩樂專區 KidsKiss 親子主題餐廳

由石門搬到北角嘅親子主題餐廳，地方更大有更多嘢畀小朋友玩！八個主題玩樂專區適合唔同年紀嘅小朋友，例如有 0-2 歲嘅幼兒玩樂區、6 歲以上小朋友專屬嘅兒童新領域就有 VR 遊戲。有大型攀爬架同滑梯畀小朋友放電，亦有閱讀專區畀大家享受親子閱讀時光。

地址：北角和富道21-53號和富中心地庫B01B號舖
面積：約 16,000 平方呎
設施：八個玩樂專區包括夢想世界、迷你市集、兒童新領域等，育嬰室
收費：收費及開放時間表
回到目錄

銅鑼灣 人氣台灣過江龍 大樹先生的家（皇室堡）

2016 年進駐香港嘅台灣過江龍，銅鑼灣店以 Next Generation 為主軸，有唔同區域畀小朋友鍛煉觸覺、想象力同創造力，例如 STEM 機器人專區同統感整合爬網區。亦有專為 0 至 24 個月 BB 設計嘅專區。更特別搵嚟有 30 年酒店經驗嘅主廚設計健康餐點！

地址：銅鑼灣告士打道311號皇室堡15樓1501-1505號舖
分店地址：荔枝角長順街15號D2 Place二期1樓
面積：約 6,000 平方呎
設施：八個玩樂專區包括 0~24 個月專區、街頭籃球波波池、STEM 機器人專區等
收費：收費及開放時間表

九龍區

尖沙咀 恐龍主題 Fusion 菜 為食恐龍‧恐龍先生

今年四月新開嘅恐龍主題合家歡餐廳，裝修配合返恐龍主題以森林風格為主，加上唔同恐龍擺設同公仔，小朋友如果係恐龍迷就絕對要去！而且餐廳有唔少卡位，一家大細去都坐得舒服。餐點亦盡量選擇新鮮、天然食材，以少油、少鹽方式烹調。

地址：尖沙咀厚福街8號H8 2樓
面積：約 3,000 平方呎
設施：桌遊及遊戲區，夾公仔機，扭蛋機，飛標機
收費：不收入場費，兒童餐及其他餐點收費可參考餐牌頁面

啟德 郵輪碼頭親子中菜館 紙飛機親子空間

位於啟德郵輪碼頭、2017 年開業嘅親子餐廳嘅設計由香港著名室內設計師陳幼堅先生主理，三面落地玻璃加上自然木系嘅主調非常討喜。另一特色係同坊間其他親子餐廳唔同，呢度主打中菜，供應酸菜魚、獅子頭、原味魚湯泡飯等。

地址：九龍灣承豐道33號啟德郵輪碼頭B區北面平台
面積：約 4,000 平方呎
設施：大型玩樂區，帳篷區，繪本區，幼兒區，多功能房等
收費：星期一至五（入場時間 2 小時 45 分鐘）：小童入場費 $138/位（包一份兒童餐），成人餐飲最低消費 $150/位；星期六至日及公眾假期（入場時間 2 小時）：小童入場費 $198/位（包一份兒童餐），成人餐飲最低消費 $100/位

觀塘 韓服體驗 + 韓式燒肉 炑八韓烤親子餐廳

由連鎖韓式燒肉餐廳炑八韓烤喺 2019 年開設嘅首間親子餐廳，特別在以傳統韓屋為設計藍本，更可以租借韓服（2-8 歲小童 免費/1小時，成人 $70/1小時）瘋狂打卡！遊樂專區有齊波波池、迷你廚房、玩具車等。食物方面有韓式烤肉，亦設計咗唔少兒童餐。

地址：觀塘鴻圖道90號2樓
分店地址：荃灣青山公路荃灣段398號愉景新城1樓1009A號舖
設施：韓屋用餐區，韓系童心空間，親子韓服體驗，育嬰室

新界區

馬鞍山 韓國品牌合作親子樂園 智寶星親子餐廳

呢間親子餐廳以藝術、環保為概念，有多達十個遊戲專區，部分更係由韓國著名品牌 Kids Factory 擔任設計，亦引入優質木材製成嘅玩具。不時舉辦特色親子班、耕種體驗班等提升小朋友嘅環保意識。食物方面亦有唔少可愛造型嘅菜式，大人小朋友見到都開心。

地址：馬鞍山保泰街16號We Go Mall 4樓405號舖
面積：約 5,000 平方呎
設施：十個遊戲專區包括雪白波波池、小煮子天地、雪白波波池等，育嬰室
收費：收費表

沙田 科學園意大利餐廳 Meraviglia Bar e Ristorante

沙田區內相當著名嘅親子餐廳，皆因室外室內都放咗唔少遊樂設施，家長可以坐喺室內透過落地玻璃睇住小朋友，小朋友又有足夠空間可以放電。另一方面佢哋嘅食品亦有水準，主打用嚴選有機食材製作嘅意大利家庭菜，有機沙律、烤肉扒、意式薄餅等都值得一試。

地址：沙田白石角香港科學園第二期科技大道西10號浚湖樓地下S040號舖
設施：室內及室外玩樂區，圖書角
收費：不收入場費，兒童餐及其他餐點收費可參考餐牌頁面
回到目錄

荃灣 藍白打卡親子 Cafe One Small Step

唔少家長會喺小朋友玩嘅時候幫佢影相，而荃灣呢間親子 Cafe 就夠晒 IG-able，皆因裝修由英國室內設計師操刀，以淺藍同純白為主調，走北歐明亮簡約風格，好啱打卡。唔少家長都指環境乾淨企理，加上食物都以少鹽少糖嘅健康路線，食得更安心。

地址：荃灣沙咀道282-284號周氏商業中心9樓
設施：大型玩樂區，圖書角，私人派對房
收費：收費及開放時間表
回到目錄

馬灣 沙灘任玩 + 傳統意菜 Cafe Roma

想親親大自然嘅話，馬灣呢個面臨海灘嘅意大利餐廳就最適合不過！今年年中完成翻新工程後，室內裝修走意式鄉村風，最加分係室外設置沙灘遊樂區，有多款沙灘玩具，亦會定期舉辦兒童薄餅工作坊。家長們就可以嘆以優質新鮮食材製作嘅傳統意大利料理。

地址：馬灣珀麗灣臨海廣場1樓7-8號舖
設施：戶外沙灘遊樂區，兒童圖書，顏色筆及畫紙
收費：不收入場費，兒童餐及其他餐點收費可參考餐牌頁面

文：Cathy.H