親戚拜年時問我政治立場

今年大年初一及年初二晚，因為小販問題搞到警民衝突激烈，社會嚴重撕裂，有人支持示威者嘅激進行為，認為佢地面對暴力打壓終於要反抗，有人認為佢地係暴徒，專門搞事破壞香港安寧，市民反應兩極化，又適逢新年流流，一家大細去拜年飲茶總會開著電視睇到呢啲畫面，當親戚問起你立場，企邊面，又點算呢?

尋日起，whatsapp多個群組已經有唔同嘅朋友係度講，尋日今日拜年個時同親戚嘈大交，因為講起外國傳媒名命嘅「魚蛋革命」，大家立場唔同，爭論不休，有人覺得「官逼民反」，政府應該負全責，有人覺得「暴徒搞事」應該開槍打死哂佢地，原本喜興嘅節日就搞到大家嘈個面紅耳赤，不歡而散。

於是，有啲朋友就諗到個對策，有個就帶定啲周星馳電影大碟上去拜年，播住戲咪睇唔到新聞，少一個激發點去討論，如果有親戚問起，都可以扮睇戲睇得好投入，避過討論。有朋友就帶定啲小朋友玩具，諗住全程同小朋友玩，唔參與任何話題。有個出名宅嘅朋友，就帶定耳筒，諗住一路食飯一路塞住播歌，就算畀親戚話，最多都係話你食飯無禮貌，唔會因為政見唔同而搞到面阻阻。當然啦，都有人索性唔去，咁就算。

親戚問起你政治立場，如果你同佢地立場一樣，當然無咩問題啦，如果立場唔一樣，真係可以無彎轉，如果你份人夠堅定，唔為你自己嘅立場而羞恥，你的確唔需要逃避，大大聲講出嚟，做自己，因為你相信你所信的事，而其他人亦應該尊重。