謝雪心擔任動漫Cosplay大賽頒獎嘉賓 網民：請唔到日本嘉賓？

第二十四屆香港動漫電玩節將於7月28日（明天）至8月1日喺灣仔會展舉行，近日大會喺社交網站出PO宣布謝雪心（心姐）將於30日為「動漫Cosplay大賽」頒獎典禮擔任嘉賓，海報除咗有心姐嘅靚相之外，仲有一個黑色嘅剪影，叫大家估下心姐當日Cosplay角色手持嘅武器係乜嘢，並提供三個選擇俾大家（A. 長槍、B. 劍及C.刀），叫大家留言估及講原因，而最有創意嘅三位就可以獲得心姐送出嘅神秘禮物一份。

現年71歲嘅心姐自小喜愛粵劇，佢喺90年代已經係當紅粵劇一線花旦，粵劇及古裝形象深入民心。最近佢喺TVB熱播劇《靈戲逼人》飾演于明，係戲班刀馬旦及龍鳳陞劇團顧問，所以佢喺劇中都有大顯功架，例如示範耍雙劍戲。由於心姐喺接受傳媒訪問時，指自己當年每日都要練刀槍劍，而劇中嘅雙劍係另一種耍法。日子有功嘅心姐，喺現場拎起雙劍時，其熟練造手同埋臉部嘅表情已經睇得出功架十足。

喺今次嘅Cosplay角色手持嘅武器選擇，唔少網民都紛紛留言話：「以上皆是」。不過根據海報嘅黑色剪影，角色應該係《原神》嘅「達達利亞」，而佢所使用嘅武器就係弓。雖然有網民都認為心姐同動漫節可以話係零關係，留言話：「唔好咁樣反高潮啦」、「心姐同動漫節有咩關係?邊個做搵人嫁?」及「邊條友諗出嚟？」等等，不過仍然有唔少網民表示好奇及想入場支持心姐：「估唔到請唔到日本嘉賓，變咗請心姐出大絕」、「要入場了」、「支持心姐」、「心姐又幾有創意 但cos男人」及「真係好出位」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！