雅虎香港新聞 【財子名花星媽】陳年露點戲出土 邵音音講艷星苦處︰當我係雞
70年代艷情片《財子名花星媽》忽然成為話題，呢套香港史上首套三點畢露嘅電影，最搶鏡嘅可能係形象正氣嘅胡楓居然有份演床戲，而電影其中一位女角就係邵氏年代拍過唔少性感電影嘅邵音音。
音音姐向來講嘢坦白，對過去演裸露戲嘅經歷從不掩飾，更透露拍戲剝衫係俾人呃，被視為「艷星」之後受盡白眼！
喺Yahoo TV《娛樂訪談》，邵音音講起當年拍艷情片，緣起於邵氏有套戲想搵金燕玲參與，但係金要去英國結婚，有人提議搵音音姐執二攤，仲話佢地似樣！音音姐又真係落搭，拍到咁上下，導演叫佢喺身上搽油，話只係拍露背鏡頭，而且只會喺螢幕上一角出現。殊不知拍嘅時候攝影師將鏡頭聚焦喺音音姐度，就係咁，變成脫星！
上流人士少不免會結識女明星，但係音音姐話，佢地被標籤為脫星嘅「俾人感覺好恥辱，係唔會有人追……嗰啲人話『我都睇過佢全身，你娶佢返去好醜喎』」，「想追你嘅咪當你係雞囉，問你幾錢」。經歷過戀愛、婚姻同離婚，音音姐睇得好化，坦言「唔會有愛情嘅……成個社會都唔肯接受你，佢要娶你，嗰個都係傻仔啦！傻仔你都唔會肯嫁啦！」。
點解可以全裸？冇犯呢條規則就得
《財子名花星媽》有音音姐同修哥肉搏戲，片中又有其他女角三點盡露。70年代社會風氣仍然保守，但係點解電影尺度咁大膽？音音姐話，當時嘅電檢規矩係，只要鏡頭前男演員雙手冇接觸女演員重要部位有所動作，即使全裸都冇問題！
艷情片點解多人睇？因為窮！
《財》以外，艷情片大行其道，大導演李翰祥就拍過唔少風月片。音音姐分析，以前經濟唔好，男士莫講話去滾，就連追女仔嘅錢都冇，一張戲飛嘅價錢可以睇到一班女星除衫，既刺激又滿足到好奇心。但係今時今日，除衫似乎無咩大不了，音音姐以彭浩翔監製嘅《同班同學》為例，4個新晉女演員全裸上陣，演出同劇本都有水準，不過埋單票房得幾十萬，所以脫唔脫都唔再係話題。
