《賭城群英會》五代港姐大晒冷

東方新地

更新日期： 2017年6月23日上午7:49

近日新劇《賭城群英會》正全城熱播，除了有久違的四哥謝賢及叻哥陳百祥外，劇中五位主要女角陳法蓉、佘詩曼、高海寧(高Ling)、文凱玲同麥明詩全部都係港姐出身，話晒美貌與智慧並重，質素自然有番咁上下！你又最鍾意邊個呢？

陳法蓉凍齡太后

現年49歲陳法蓉89年當選港姐冠軍，90年就擔正拍《人在邊緣》，及在電影《賭俠》中演出「龍九」一角走紅，之後佢就專注拍戲，但可惜冇咩代表作，直到2001年拍張衛健版電視劇《小寶與康熙》，陳法蓉一人分飾太后同龍兒兩角，令觀眾留下深刻印象，雖然套劇已過16年，但睇番陳法蓉個樣都冇咩點變，認真係凍齡有術！

劇中男角普遍年齡遍高，莫講話陳法蓉望落只得3字頭，就算計佢真實年齡49歲，都同66歲阿叻都相差多達17歲，幾乎做得兩父女！

陳法蓉16年前在《小寶與康熙》一劇中分別扮演假太后和龍兒兩角，一個霸氣一個溫柔，同樣美艷動人。

阿佘兩度封后

42歲佘詩曼(阿佘)97年攞港姐季軍入行，初出道已獲力捧，先後擔正拍劇集《雪山飛狐》同《刑事偵緝檔案IV》等劇，2000年拍主張智霖主演《十月初五的月光》更一炮而紅，之後阿佘努力改善雞仔聲，演技亦愈做愈好，拍過多部劇集如《宮心計》、《公主嫁到》、《使徒行者》等，都係當年收視冠軍，06年阿佘終憑《鳳凰四重奏》一人分飾四角，登上第一個視后寶座，2014年更以《使徒行者》「釘姐」一角，連奪「最佳女主角」和「最受歡迎電視女角色」，成為首位「雙料視后」。

阿佘同馬國明呢pair曾經喺微電影《愛情來的時候》入面合作過，今次終於有機會咀嘴！

高Ling 盪奶上位

30歲高Ling 08年選港姐時三甲不入，只攞到一個旅遊大使獎，但就獲簽入無綫拍劇，但多做花瓶角色，最受人注目反而係高Ling喺多個綜藝節目大晒其34D上圍，包括2011年《為食總司令》越南篇洗泥漿浴、2012年《五覺大戰》扮「紫荊俠」玩盪奶漂移等，2013年《法網狙擊》入面一幕露背強姦戲，更令高Ling人氣即時急升，行出街都多咗唔少市民認識，從此高Ling逐漸多咗唔少劇拍，當然劇中都唔少得要繼續晒吓身材。