賴慰玲一索得男鄭嘉穎陳凱琳榮升契爺契媽

orientalsunday.hk

更新日期： 2017年12月8日上午1:37

恭喜！恭喜！31歲嘅賴慰玲 (Winki)生咗BB，一索得男，母子平安！Winki同舞台劇演員男友梁子峰拍拖5年，今年9月奉子成婚，預產期今月初，之前賴慰玲出席陳嘉寶婚禮話已經執定「走佬袋」因為隨時生。今日賴慰玲就報喜話剖腹誕6磅囝囝，又在社交平台上載多張相合照，而囝囝嘅英文名叫做「Marat」，係由契爺鄭嘉穎改，認真開心呀！

圖片來源：新傳媒圖片庫、陳凱琳，賴慰玲Instagram

賴慰玲一索得男陳凱琳、陳嘉寶榮升契媽

陳凱琳先在Instagram上載與陳嘉寶到醫院探望賴慰玲母子的合照，她用英文留言：「Hallelujah, praise God! It is my greatest pleasure to announce that both baby & mommy are safe and sound! Welcome to this world my dear godson, I promise to be there for you, take care of you and love you each and everyday!（哈利路亞，感謝主！我好榮幸宣布BB同母親都安然無恙！歡迎我親愛的契仔來臨世上，我答應在此守候你，照顧你同每天都愛護你！）」據知，陳嘉寶都係BB嘅契媽！照片中的賴慰玲好精神，而陳凱琳就抱住熟睡中的契仔，BB鼻子高高，輪廓分明好靚仔呀！

賴慰玲親自報喜 Post埋生仔相

之後賴慰玲也親自在社交平台報喜及上載多張相片，見到好多朋友已經去咗探BB，包括契爺鄭嘉穎、陳凱琳、田蕊妮、陳嘉寶、孫慧雪等。賴慰玲留言話：「Yes!!! My baby boy is born!!!3kg , super lovely」。跟住Winki又話：「原來生仔真係好痛㗎！搏鬥36小時，可惜最終都係要剖腹，無辦法，安全最緊要嘛！」，Winki囝囝嘅英文名叫做「Marat」，係由契爺鄭嘉穎改！「英文名由KC契爺改好，Marat，佢話要好Man，Man到心口有胸毛」賴慰玲不忘答謝老公：「多謝BB爸爸的陪伴，沒有你就不能有我們」好Sweet呀！

簡單簽紙結婚

當時由於賴慰玲腹大便便，所以婚禮未有大搞，簡簡單單簽紙結婚，同好友親友分享喜悅，但一對新人都有跟傳統向長輩斟茶，而Winki之前在TVB拍《女人俱樂部》而同陳嘉寶、陳瀅成為了好朋友，所以她們都有出席婚禮，同場還有蔡思貝及在《殭》中合作過的鄭嘉穎。

晒大肚寫真

臨盆在即的賴慰玲早前在社交平台分享性感大肚寫真，以全黑Look示人，展露型媽一面。佢話：「由兩條線到了今天，一步一步走來真不容易。第一次產檢聽到你的心跳聲，喊咗；第一次感受到你的胎動，喊咗；第一次向朋友介紹你的出現，喊咗；第一次見到你郁到我個肚3尖8角，笑咗。這8、9個月來相依為命的每一日，你都令我感覺到好溫暖（有時仲會好熱），女王式的生活快要結束，爸爸媽媽都好期待和你見面，和你一起健康、成長，咁到底你係幾時出嚟呢？」

選擇順產

上月尾出席好友Anjaylia婚禮時，就話BB已經足月兼隨時生得，所以已經準備好「走佬袋」。當時她說﹕「不過已經足月了，我都有想過，飲飲吓作動應該會幾刺激。老公都有來，因他和新郎是朋友，『走佬袋』都放了在車上，隨時ready。同埋我近排出街都會想，如果行行吓街作動會怎樣，應該很刺激。」賴慰玲透露會選擇順產，直言想感受生仔的痛楚。