超過400年歷史 東京寺廟推出相睇服務
日本有唔少古老寺廟,好多本地居民或者遊客都會去參拜求符祈福等,東京一所超過400年歷史嘅古寺「築地本願寺」就與別不同,於7月開始推出相睇服務為信眾匹配,結果大受歡迎!寺廟希望有興趣嘅信眾先入寺坐低面談,由寺廟製作個人資料庫,再配對適合男女見面,推出兩個月以來有20多人加入,年齡由20至70歲都有。
有參加者就話坊間有唔少婚姻介紹所,不過感覺似呃人;而市面上嘅交友APP又未必真係識到心儀異性,反而寺廟最令人安心,可以十分信任由寺廟介紹嘅異性,唔使擔心會被人欺騙。原來負責呢項服務嘅寺廟工作人員過往係從事婚姻介紹所工作,而創辦服務嘅宗務長安永雄宏更大有來頭,曾於英國劍橋大學修讀經營管理學博士,一直於投資銀行工作直至50歲先正式出道為僧。日後有機會去築地本願寺參拜時,記得留意下呢項服務喇,話唔定可以求得好姻緣呀!
相關文章: