跳艷舞都要清場 蘇麗珊激咀王陽騰晒雞

【星島日報報道】蘇麗珊向來形象清純，不過最近她在電視劇《無間道》來個突破演出，不但穿低胸短裙扮陪酒女郎，還在大奸色羅嘉良面前跳艷舞，之後與男主角王陽激咀再摑對方一巴掌，蘇麗珊坦言拍這幾場戲勁緊張，導演見她騰晒雞，下令清場拍攝！ 雖然已不是螢幕初吻，但蘇麗珊拍吻戲前仍難掩忐忑心情，原來真正問題不只是害羞。她說：「拍強吻戲要做掙扎反應，有幾次因為撞嘴要NG，再加上緊接我摑王陽一巴，反應唔連接又要NG，又要再錫和再打。王陽好好，佢叫我唔好就住打，要狠狠真打，真係打到佢面腫，非常唔好意思！」不過相比這場動作戲，蘇麗珊笑言跳舞戲更難演。 第一次拍電視劇就要跳舞，而且是艷舞，蘇麗珊笑言擔心跳到似機械人，加上同場其他女演員跳得太出色，為怕被比下去勁緊張。她說：「第一次係鏡頭前跳舞，條裙又短又低胸，仲要喺嘉良哥面前跳，心情非常緊張，但都要硬著頭皮跳。因為我唔識跳舞，隔離嘅女孩子又扭得好厲害，所以拍攝前要特訓，勁練咗幾十次先至夠膽喺鏡頭前跳。好多謝Toby（梁靖琪）花咗一日嚟教我跳舞，收咗工都專登留低陪我壯膽，畀咗好多信心和支持我。」她笑言打戲和跳舞戲難度一樣高，她說：「跳舞同打戲，係兩種好唔同嘅感覺，可能因為我細粒，又唔夠力量，所以覺得好難制服到賊人，效果搞笑。不過打戲動作快，加上後期剪接後見得吓人。但跳舞就好驚觀眾睇咗會覺得好流，仲要喺咁多前輩面前跳舞好尷尬，更加緊張。大家見我咁驚都唔敢笑，仲清場拍添，結果出嚟效果大家都好滿意！」

睇更多