跳跳跳台灣旅行團︱Alina李炘頤學跳啦啦隊舞作狀扮嘔 網民：完全唔尊重啲舞者

ViuTV節目《跳跳跳台灣旅行團》搵嚟「大表嫂」李炘頤（Alina）及右雨擔任主持，二人前往台灣採訪唔同嘅舞團，同當地舞者透過舞蹈作交流。近日就講到佢哋去搵啦啦隊慕獅女孩Muse Girls學習跳啦啦隊舞，不過Alina嘅表現就惹來網民反感，並指節目組搵錯人及大鬧佢冇禮貌，完全唔尊重舞者。

喺前晚（12日），Alina及右雨跟啦啦隊慕獅女孩Muse Girls學習跳啦啦隊舞，期間佢哋一齊跳「Gwiyomi」舞，不過Alina就大部分時間都疑似黑面，好似好唔情願嘅表情，去到最後排舞後仲作狀扮嘔，並話：「我覺得自己好嘔心呀」。

Alina有解釋自己跳得唔好嘅原因：「噚日定前日先收到話要跳Gwiyomi，我心諗大鑊啦今次！因為每次做呢啲可愛嘢，我都覺得係好大鑊嘅，因為本身我個樣唔係嗰啲可愛型㗎嘛，咁我夾硬咇呢，可能就會令觀眾覺得唔舒服，唔好意思呀觀眾！」及「我覺得我又唔係唔可以可愛風嘅，但我覺得我嘅衣著、妝頭要幫我好多，我先可以做到呢個效果！」，不過佢都有話覺得開心：「喺台灣跳舞嗰個氛圍係好好，最緊要enjoy啦，即係拍嘢所有嘢都係，咁你今日唔知聽日事，咁咪enjoy咗先囉，人哋鍾唔鍾意，關你咩事啫！」另外，佢又拉埋所有港女落水話：「我覺得呢啲歌只係啱韓妹同台妹，港女唔係好啱Feel，因為我哋啲港女成日都好猙獰呀個樣，呢啲咁可愛，我未handle到。」

節目出街後，唔少網民都不滿Alina嘅表現，紛紛留言指節目組搵錯人及鬧爆佢冇禮貌， 完全唔尊重舞者，例如「Alina好似咩都話唔啱咁嘅」、「Alina隻隻舞都唔岩（啱）佢 係咪搵錯主持人」、「唔想睇到Alina」、「佢今集直頭有種睇唔起人地（哋）呢個舞種嘅感覺」、「拖晒港女落水」、「唔知拍咩嘅咩 著衫都唔知」、「嫌棄寫哂上面」、「嘩啱啱轉過黎，係咪又睇唔起人」、「Alina基本上同成個節目完全唔夾」、「條女都幾癲，拍緊節目都可以唔尊重到咁，平時真係唔知佢有幾白鴿眼」、「​​哇 唔好話節目效果呀 俾啲尊重人哋啦啦隊啦你」、「我已經睇到連對Stanley嘅好感都無埋」、「佢唔好再出黎啦 真係愈睇愈乞人憎」、「頭先扮嘔嗰下好黑人憎」、「Alina 完全唔尊重啲舞者，跳完直接扮嘔 睇到都乞人憎」及「嘔嗰下勁冇禮貌」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！