踢走抑鬱重修塌鼻韓君婷含淚祭亡母

東方新地 - 娛聞

更新日期： 2019年4月7日上午7:58

韓君婷（鬼妹）的人生故事，絕對可以寫成書，22歲成為亞姐冠軍，青春無敵有樣有身材，事業運亦暢順，由亞視過檔去無綫發展，得到不少機會，不過情路卻坎坷，初戀男友是著名髮型師葉錦昌（Sherman），98年熱戀期間Sherman發現患上肝癌，當年她經常陪伴男友出入醫院，不離不棄。韓君婷曾透露男友已向她求婚，可惜最後天人永隔。
韓君婷一直未有放低Sherman，其後拍拖多次都無結果，她更患上抑鬱症及厭食症，10年毅然離開香港返回新加坡與家人生活。近年韓君婷回流返港，其母亦跟隨回港照顧她，可是天意弄人，韓母因甲狀腺病及肺癌纏身，去年6月亦離她而去。再次承受摯愛離去的悲痛，對韓君婷打擊甚大，再加上一次意外令靚鼻變塌鼻，被外界指指點點，有苦自己知。日前韓君婷到和合石拜祭亡母，見她對住龕位傾足30分鐘，看來有很多情深說話未曾講。韓君婷表示抑鬱早已痊癒，現在會積極面對未來，重新投入演藝事業，學會接受不完美的自己，努力工作儲錢到美國做修鼻手術，相信她在天國的母親，一定很開心見到一個充滿正能量的女兒。

撰文：東方新地圖片：新傳媒圖片、韓君婷IG

韓君婷含淚祭亡母

韓君婷多年來的形象都是鬼妹仔、大笑姑婆，但這二十年來的人生經歷卻令她嘗盡別離的傷痛，抑鬱症及厭食症更使她要暫別娛樂圈，07年患上抑鬱症，她花了兩年多時間治療，那段時間她收埋自己，演藝事業被迫煞停，直至在新加坡生活的父母與哥哥叫她返去養病，她再次重投家人的懷抱。在新加坡生活了差不多四年，韓君婷決定返港，轉行到醫學美容中心做OL。

重拾家庭溫暖

孻女孻心肝，韓君婷返港後，其母不時由新加坡來港照顧她，去年更決定留港生活，可惜卻發現肺癌已到末期，侍母至孝的韓君婷更辭工陪伴母親行最後的路，母親走後，她需要很長時間才能接受事實。早前韓君婷踩單車去和合石拜祭亡母，見她一早去買花買祭品，拎到一袋二袋去到母親的龕位前，細說自己的近況，雖然對住空氣說話，但卻感受到她與母親的深厚感情。趁著韓君婷離開時，本刊記者上前採訪，她亦大方回應，表示一有時間就會去拜母親，對於母女最後相處的時光，韓君婷感受至深，「照顧媽咪最後嘅路，我深深感受到愛一個人，除咗細心照顧，仲要有好多原諒同包容，我提佢食藥，佢會嫌我煩，我哋成日有拗撬，不過兩母女最後都會冇事。我返香港選亞姐入行嗰段時間，家人唔喺身邊，原來我忘記咗家嘅感覺，親人就係開心共處，有拗撬但又會氹番大家，係佢令我重拾呢種感覺。」

為照顧母親，韓君婷近年花了很多時間，她承認母親臨終前最擔心就是她，她說：「有時佢會覺得因為我要照顧佢，所以唔出去識男仔拍拖，我同佢講我唔係掉低自己嘅感情，只係未係時候，當我準備好，就會去追求自己要嘅嘢，佢都明白遇唔啱就唔好勉強。媽咪雖然擔心，但佢都放心，佢向來對我好有信心，亦知道咁多年嚟我要做到嘅事我一定會做得到。我哋兩母女性格都好強，我好似佢，唔會開口埋口講愛，但我哋會直接行動，佢會拖住我隻手講：『聽日我想自己行吓，不如你都去玩唔好咁早返屋企！』有時大家挨住大家，拖住慢慢行，已經感受到愛。」

這日韓君婷選擇踩單車去和合石墳場，超過30分鐘的路程，要上斜又落斜，其實都幾辛苦，難怪鬼妹熱到要除褸。

當年返港後正式露面的韓君婷，面容有變，本來甜美的樣貌，因為塌鼻而被指變得怪樣，更有指她整容失敗，為此韓君婷已多次澄清是因為在浴室滑倒而令鼻骨嚴重受傷，最不幸是入院醫治時被細菌侵蝕，萬中無一的意外令她的鼻變成這樣，靚樣一去不返，韓君婷已懂得學會接受不完美的自己，「人係會有高低起跌，對於過去嘅嘢，我學識接受。之前個鼻搞到咁，喺香港冇一個醫生完全有信心可以整番好，早前終於畀我搵到個美國醫生，但去年媽咪嘅醫療費用花費好大，而去美國做手術要好多錢，我暫時唔能夠負擔得到。其實遲啲整都唔緊要，以前我個樣可能有100分，依家得70 分都ok嘅！我會勤力啲做嘢搵錢，希望儲到錢可以整番好個鼻。其實之前我做咗一個皮膚增生療程，做完之後發現個鼻嘅組織有增生到，依家個鼻有好轉，可能大家亦睇慣咗，順眼番。」

拋低包袱做醜角

事隔多年，韓君婷重返演藝事業亦遇上不少阻滯，難得她仍抱住百分百的正能量，揚言甚麼角色都願意嘗試，「工作方面我係向前望，依家主要接啲司儀同主持工作，如果電視台有角色容納到我，我都好願意去拍，我知道靚女角色已經唔輪到我，做醜角、做人阿媽、要執紙皮嗰啲角色我都ok㗎！我已經掉低晒所有包袱，以前嗰啲冠軍、鬼妹仔、女神，好高嘅位置，搞到自己條路窄咗，依家我可以做唔同範疇嘅嘢，希望用演技令大家另眼相看。」除了積極回歸幕前，韓君婷近月在社交網亦非常活躍，不時自拍下廚短片放上網，分享整麵包、蛋糕及各國美食，實行轉型做美食KOL，原來她自小對烹飪便非常有興趣，現在更會自家鑽研食譜，落手落腳擺好機位拍攝之餘，就連拍片剪片都一腳踢，其實韓君婷周身刀，唔賣樣一樣可以殺出新血路。