【遊車河】懷舊船河 揸車橫渡維港

今時今日過海就話都冇咁易啦，東、西、紅三條隧道任你揀。不過早在1972年之前，即係當紅隧仲未通車嘅年代，揸車過海只有一條「水路」，即係連人帶車一齊坐「汽車渡輪」。呢種上世紀嘅交通工具，今時今日已經不復再，因為最後一條汽車渡輪航線已經喺1998年停辦，而5艘汽車渡輪都已經改裝成用嚟開「船P」嘅維港遊渡輪，平日亦只會運送危險品車輛來往大嶼山，其餘時間就冇再用嚟運載私家車。

汽車渡輪喺1998年停辦，相隔18年後終於再有機會揸車橫渡維港。

上船後先用木方攝好所有車輪，跟住就可以開船。

隨住碼頭塊斜板吊起，懷舊之旅正式開動！

不過，呢個5月汽車渡輪又再興起，因為船公司為慶祝汽車渡輪83周年，特別想懷舊一下，於是決定嘅喺幾個特選周末同公眾假期作「期間限定」復航，目的梗係唔係送人過海咁簡單，主要係俾我哋呢一代人體驗揸車橫渡維港嘅滋味。

每班船可以載30架車，如果全部係大碼七人車，就可能會少幾架。

留喺甲板睇海景，可惜撞啱嗰日好大霧……

呢艘渡輪叫「民檢號」，船身有三層，中層係乘客位。

呢幾個特選日子包括啱啱過咗嘅5月1、2日，另外就係5月8日佛誕假期，同埋5月14及22日兩個周六、日，班次分別係上午10:15（北角開）、中午12:25（觀塘開）同下午2:30（北角開）。收費有兩種，成人$100，小童$60，另外每架車再收$100，電單車就收$60。

頂層係冷氣餐廳，平日亦都可以包場搞婚宴，收費大約兩萬蚊。

有啲傳媒話，收費仲貴過來回行一次西隧……其實咁諗係多餘嘅，因為呢次係遊船河，唔係交通過海，而且收費已經包埋飲食，咖啡奶茶餐蛋麵串燒乜都有，仲可以捧埋個麵落架車吹住海風慢慢歎，咁你話行西隧有冇咁好招呼？打開窗吸塵就有你份。我問過好多參加嘅人，都話其實係生平第一次搭汽車渡輪，大部分都只係細個聽講過，但係屋企當年冇私家車，所以都冇機會揸車上船，今次假日復航，仲可以同屋企老人家一次懷舊下添。

船程大約1小時15分鐘，期間會巡遊維港一次。

呢個就係駕駛室，正副船長都喺入面，位於最高層。

聽啲船員講，每班船大約可以載30架私家車，視乎啲車嘅大細，如果架架都係Alphard、Elgrand之類大車，咁就會縮減至廿零架。出發當日，人同車都要預早30分鐘到汽車渡輪碼頭集合，排好晒隊等艘船泊岸，然後碼頭地面個斜台會降低，所有車就可以逐一揸上船。上船次序就其實冇乜所謂，不過如果想影相特別啲，揀頭車或尾車會得意啲，頭車嘅好處係第一個上船兼第一個落船，畫面入面唔會有其他車；尾車就調番轉，上落船都可以影到最多車群，而包尾落船都有好處，就算hea多一陣，都唔怕阻到其他車離開。

汽車渡輪喺1933年首辦，今年係83周年紀念。

唔少遊人都鍾意留喺底層甲板，吹住海風食餐蛋麵。

船程大約1小時15分鐘，有人鍾意留喺甲板吹海風睇海景，以前啲人甚至連食麵都坐喺車入面，因為過海其實只係十幾分鐘時間。不過，今次由於係遊船河性質，艘船會來回維港兜一轉，所以如果影夠相嘅話，不妨去上層坐低歎杯茶，餐廳仲貼咗好多歷史相，而啲船員都好nice，同佢哋傾偈會聽到好多有趣故仔。亦可以行近駕駛室睇下船長點揸船，順帶一提，呢種汽車渡輪分前後兩組螺船漿，所以駕駛室有兩個控制陀，呢個設計係方便艘船可以原地360轉身。

到站後陸續上岸，記得保持笑容，因為好多龍友影相。

汽車渡輪平時用嚟運載危險品貨車，來往觀塘同大嶼山。

最後要講嘅就係，呢個活動自從公布以來，反應其實幾熱烈，船公司話餘下嘅所有車位其實基本上爆滿，而家先報名就只有落後補waiting list，但係「人位」就非常鬆動，就算冇得揸車都可以考慮上船玩番轉。不過，船公司話今次咁成功，好大可能會添食，咁就快手Like咗佢哋個facebook，到時一有消息就可以搶先報名。